La presidente de Tanzania mori entre rumores de covid

John Magufuli, presidente de Tanzania, ia mori ier de un disturba de cor en un ospital en Dar es Salam. El ia ave 61 anios.

El no ia es publica videda tra plu ca du semanas, e rumores ia sirculi sur sua sania. La xef oposante, Tundu Lissu, ia dise ce Magufuli ia developa covid, ma esta no es confirmada.

El ia es un de seticas african major contra la siensa de coronavirus e ia recomenda batalia la maladia con preas e vapor erbal.

Vispresidente Samia Suluhu Hassan ia anunsia 14 dias de dol nasional. Longo la constitui tanzanian, Hassan va es induida como la presidente nova per completi la presidentia de sinco anios cual Magufuli ia comensa en 2020.

Magufuli no ia es videda pos 27 febrero, ma Kassim Majaliwa, ministro xef, ia insiste en la semana pasada ce la presidente es “sana e asidua laborante”, culpante tanzanianes estra la pais, disente: “Sperde rumores ce el es malada pare odiosa.”

En junio pasada, Magufuli ia declara Tanzania “sin covid”. El ia burla la eficasia de covrefases, ia espresa dutas sur probas per la virus, e ia tisa paises visina cual ia pone metodos medical per restrinje la sperde.

Tanzania ia publici no detalias sur sua casos de covid pos maio, e la governa ia refusa compra vasines.

Magufuli ia es declarada como presidente a sua aniversario 56 en otobre 2015. El ia comensa sua periodo du de presidentia pos un eleje disputada en la anio pasada. On ia bonveni sua disposa forte contra sobornas, ma ia acusa el de puni disentores e de limita alga librias.

Sua oposores acorda ce el ia contribui a la developa de Tanzania. El ia investi a projetas grande de infrastrutur, como un ferovia de largia normal per lia la pais a sua visinas, autovias major, e un sistem de buses en la sentro comersial en Dar es Salam, la capital.

El ia aumenta ance la produi de eletrica, reduinte la nesesa de rasiona enerjia.

Ma sua responde a covid va defini el en la istoria. On ia fa poca probas per la virus en la popla tanzanian e ia projeta no program de vasini, tal ce la pais resta estra la pratica normal.