La NU averti la militar de Miama

La Nasiones Unida ia averti la militar de Miama ce “resultas sever” va resulta pos cualce supresa violente de la protestas cual continua contra la colpa de stato ala.

On ia restora la asede a la interede en la pais a esta matina pos un rompe tra un note du. La junta ia bloci la ueb per atenta sofoca disentis pos la colpa a 1 febrero.

Christine Schraner Burgener, ambasador spesial de la NU a Miama, ia dise ce “on debe respeta plen la direto de asembla pasosa”. El ia fa sua averti en un telefoni ier con Soe Win, la suxef de la junta, asentuante ce perdes de interede “sumina prinsipes democrata fundal”.

Miama ia esperia dias de protestas pos la colpa militar en cual la junta ia suverti la xefes elejeda (incluinte la promovor de democratia Aung San Suu Kyi), alegante manipula de votas. La militar ia furni no atesta per suporta sua alegas.

Temprana oji, protestores ia reasembla en sites como Yangon e Mandalay. Estra Yangon, alga persones ia reclina sur la ferovia per impedi la servi de tren.

La partisipa a protestas resente pare min grande ca a los de la semana pasada con deses de miles de persones, car la militar ia aumenta aora sua presentia.

La junta ia anunsia ance punis sever per sua oposores, disente ce los ci preveni ce la fortes de securia fa sua labora risca 20 anios en prison, e los ci tisa la teme o la tumulta publica pote es prisonida per entre tre e sete anios.

A saturdi, la militar ia dona a se la potia de aresta, xerca e deteni persones per plu ca 24 oras sin desides de corte. Lo ia comanda ance ce jornalistes no descrive la situa como un colpa de stato.

Dias resente ia vide ance un aumenta de violentia. On reporta ce la fortes de securia ia xuta baletas de cauxo per desgrupi la folas. En videos postada a redes sosial, on oia lo cual pare es la sona de xuta en cuando persones fuji.

La perde de interede en la note pasada segue un model intendeda per rompe la oposa continuante a la colpa e a la deteni de la xefes elejeda.

Telenor, compania major de telecomunica, ia dise ce lo no va refresci plu un lista sur rompes de interede a sua pajeria. Lo ia dise ce la situa es “confusada e nonclar” e ce la securia de sua empleadas es un “conserna xef”.