La festa la plu grande de sinematografia en Africa

La numero 27 de FESPACO, la Festa Panafrican de Filma e Televisa de Ouagadougou, ia comensa en la capital de Burcina Faso. La tema es “Sinemas de Africa e la Diaspora: perspetivas nova, defias nova”.

Miles ia foli la compleso Palasio de Sportes en la distrito Ouaga 2000 per esperia la comensa de la selebra la plu grande de sinematografia en Africa, cual estende de 16 a 23 otobre.

La aveni ia es inisial projetada per febrero de esta anio, ma ia es posponeda par causa de la pandemica de covid.

FESPACO, cual ia orijina en 1969, es un festa internasional reconoseda cual atrae sinemafilicas de tra la mundo per selebra filmas produida xef en Africa par africanes.

Securia ia es sever en e sirca la compleso, con la armada stratejial postida tra la site. De 2015, Burcina Faso batalia un rebela par grupos djihadiste en la rejiones norde e este.

Elise Foniyama Ilboudo Thiombiano, ministro burcinabe de cultur, ia dise: “Fasante la crise nonpresededa de securia, nos resta stante.” La presidente, Roch Marc Christian Kaboré, ia es presente, como ance la ministro de esternas e ambasadores internasional.

De la 1132 entradas proposada en ses categorias, on ia eleje 239 filmas de 50 paises per la lista major. 17 filmas longa va batalia per la premio xef, la Cavalo de Oro de Yennenga, nomida per un bestia en mitolojia burcinabe.

Sua dirijores veni de Aiti, Angola, Burcina Faso, Camerun, Costa de Ivor, Lesoto, Magrib, Misre, Namibia, Nijeria, Ruanda, Senegal, Somalia, Tanzania, Tunis e Txad.

La premior ultima va es elejeda par un juria internasional dirijeda par Abderrahmane Sissako, sinemiste muritani, ci en 2015 ia gania la premio nasional franses, César, per la filma la plu bon, per Timbuktu.