La contamina de aira deveni plu grave en Delhi

En la capital de Barat, tota scolas e universias es cluida per tempo nondefinida par causa de la nivel malinte de contamina de la aira. Un nebla nosiva covre Delhi ja de la festa divali.

Laboras de construi es ance proibida asta 21 novembre, ma on ia fa un eseta per projetas con relata a transporta o defende.

On permete la opera de sola sinco de la 11 sentros eletrical cual usa carbon en la site.

La niveles de PM_2,5 – particulas pico cual pote bloci la pulmones de persones – en Delhi es multe plu alta ca la recomendas par la Organiza de Sania Mundal. A martedi, alga partes de la site ia rejistra un cuantia prosima a o plu alta ca 400, en la categoria “grave”.

On regarda un cuantia entre zero e 50 como “bon”, e entre 51 e 100 como “sasiante”.

La contamina ia obliga ja alga scolas a clui en la semana pasada. La governa de Delhi ia dise ce lo considera introdui un state de enclui per boni la cualia de aira, con ce nubes densa de nebla fumosa engoli la site.

Delhi es la capital la plu contaminada de mundo, par un misca de fatores cual inclui emetes veculal e industrial. La aira deveni spesial nosiva en la menses de inverno cuando cultivores en statos visina arde palias basa.

Focos artal en la festa divali mali plu la cualia de aira a la mesma tempo. E la nonrapidia de la venta partisipa ance, car lo catura la contaminantes en la parte plu basa de la atmosfera.