La Coloseo va reseta un solo nova

La governa italian ia aproba un scema per furni un solo nova a la Coloseo de Roma, permetente ce visitores pote sta do gladiatores ia combate en la eda antica.

Dario Franceschini, ministro de cultur, ia anunsia ier la projeta per construi la solo retirable de lenio. La compania Milan Ingegneria ia gania la contrata de 18,5 milion euros per desinia la solo, de cual on previde sua completi en 2023.

A presente, esta monumento de 2000 anios ave no solo. Arceolojistes en la sentenio 19 ia sutrae la solo orijinal, esposante la rede de tuneles suteran do on ia teni gladiatores e animales ante la comensa de cada sesion de sporte de sangue.

Franceschini ia dise ce la solo nova “estracomun” va permete ce visitores “vide la gloria de la Coloseo” de sua sentro. El ia nota ce on va pote reali avenis cultural en la Coloseo pos restora la solo.

Milan Ingegneria, compania italian, ia es un de des organizas competente ci ia responde a la clama par la governa italian en 2020 per ofres per desinia la solo nova.

Sua scema implica instala sentos de laminas de lenio turnable per permete ce lus natural e aira entra a la cambras su tera. La solo nova de 3000 metres cuadrida va es desinstalable, per caso ce on va vole adota un otra desinia en futur.

La Coloseo ia es la amfiteatro la plu grande en la Impero Roman. Batalias de gladiatores e otra spetaculos publica ia aveni ala ante un fola de minima 50 mil persones.

An si la pandemica ia limita turisme, la Coloseo es ancora un de la monumentos la plu famosa de Italia. Lo ia atrae sirca 7,6 milion visitores en 2019.