Itiopia fa un vota jeneral a media de conflita

Itiopianes vota en elejes major su la tensa cresente de un conflita sanguosa en la rejion Tigray en la norde de sua pais.

Esta sonda, retardada par la pandemica, es la proba prima de Abiy Ahmed en un eleje pos sua ariva en la posto de ministro xef en 2018.

El espera oteni la autoria de la popla par gania un majoria de la 547 sejas de la parlamento federal.

Ma on ia pospone la vota en Tigray, do la armada batalia un forte rejional ja de novembre. La prosede de vota es ance retardada en sirca un sinci de la pais par causa de problemes de securia e lojistica.

Esta vota jeneral, la prima pos 2015, ia es orijinal projetada per agosto 2020, ma la coronavirus ia forsa ce on abandona acel data.

Longo la scema inisial, on va anunsia la resultas inisial per la sejas rejional a no plu ca sinco dias pos la vota. La resultas final sertida va es anunsiada a no plu ca 23 dias a pos.

Cuando Abiy ia asende a la posto xef, el ia es suportada par protestas contra la governa dominada par la Fronte de Libri la Popla de Tigray (FLPT). El ia crea un partito nova per junta la alia governante en un sola organiza. La FLPT no ia partisipa.

El dise ce la vota presente es “la atenta prima par la nasion a elejes libre e justa”.

Sua zelo reformiste ia gania per el la Premio Nobel de Pas en 2019. Ma a sola un anio plu tarda, el ia fa un opera militar en sua propre pais, enviante soldatos a Tigray per despone la FLPT pos cuando esta ia saisi bases militar ala.

Esta ia provoca un conflita cual ia mata miles de persones e ia crea un famia vasta en la rejion.