Inondas grave en Xina sentral

Pluve recordo en la sentro de Xina ia causa inondas estrema cual ia mata 12 persones e ia obliga plu ca 100 mil persones a evacua sua casas.

Plu ca des sites en la provinse Henan, incluinte sua capital Zhengzhou, es afetada. Videos sirculinte enlinia mostra persones vadante en acua profonda asta la peto sur stradas e stasiones ferovial.

Presidente Xi Jinping ia dise ce “la situa de preveni inondas es multe grave” e ia ateni “un grado crisin”. El ia ajunta ce la inondas ia causa ja “perdes notable de vive e danas a propria” e ia comanda tota departes a trata prima “la securia de persones e sua propria”.

La provinse Henan, cual ave sirca 94 milion abitores, ia avisa un averti climal de nivel la plu alta. Autoriosas local ia descrive la inondas como un aveni de “un ves en sento anios”.

La pluve ia comensa en la finisemana, e la tempestas ia intensi ier. En la note, Zhengzhou e otra locas ia esperia inondas vasta. On ia reporta persones puxada a via par acua rapida e autos e detrito flotante longo stradas sumerjida.

Jornales local dise ce sirca 700 pasajores en Zhengzhou es trapida en un tren tra 40 oras a la min. Videos nonsertida mostra persones en vagones de metro, inondada asta la spalas. On vide salvores ci usa cordones per tira alga persones a securia, en cuando otras sta sur la sejas per ateni resta supra la acua.

Ance en la note, un ospital en Zhengzhou ia perde sua eletrica, ma on ia restora lo. 600 pasientes multe malada ia es entretempo moveda a un otra loca.

Alga pararios e lagos de reserva ia esede sua nivel de alarma, e on ia posti soldatos per diverje rios cual ia supraflue. Operas de avion e tren en multe partes de Henan es ance suspendeda.

Un fesur de 20 metres ia apare en la parario en la site Luoyang. La armada ia averti ce la strutur pote “colasa a cualce tempo”.

Un usor de la plataforma Weibo ia dise ce abitores en la vila Sishui es trapida sur sua tetos. “Nos no sabe nada… la vileta intera es a punto de es tirada a via.”

Canales governal ia televisa metraje de un enfanteria inondada de cual on ia estrae la enfantes par flota los en tances plastica.

La servi meteorolojial de Xina ia predise ce partes de la rejion va continua vide “tempestas grave o estrema grave” e ce probable la pluve forte no va fini ante jovedi. La cuantia de pluve en Zhengzhou en la tre dias pasada es egal a la cuantia tipal de un anio completa.