Frans reseta la restas de un jeneral napoleonal

La restas de un de la jenerales favoreda de Napoleon ia es redonada a Frans, a du anios pos ce on ia descovre los en la ueste de Rusia.

La sceleto de Charles-Étienne Gudin, con sola un gama, ia es trovada en un parce su la funda de un solo de dansa. Sua identia ia es confirmada par ADN.

Gudin, ci ia ave 44 anios, ia es colpada par un bal de canon prosima a la site Smolensk en la invade franses de Rusia en 1812. On ia debe amputa sua gama e el ia mori de gangrena pos tre dias. Sua cor ia es reprendeda e enterada en Frans.

Ier, sua caxon funeral ia es ofisial resetada par la ministro franses per veteranes, con gardores onorante en uniformas napoleonal.

An tal, un projeta per un rituo plu grande (con partisipa de ofisiores de Frans e Rusia) ia es canselada par causa de la tensa entre la du paises.

Naseda como aristocrata, Gudin ia es un veteran de e la Geras de la Revolui Franses e la Geras Napoleonal. El ia vade a la mesma scola militar como Napoleon, e on crede ce el ia es un de la jenerales favoreda de la imperor franses.

El ia gida la ataca contra la armada rusce en la site Smolensk cuando el ia perde sua vive.

La xerca per la restas de Gudin ia comensa en maio 2019, dirijeda par la istoriste Pierre Malinowski, con suporta de la Cremlin.

Rexercores ia usa la recordas de Louis-Nicolas Davout, un plu jeneral franses de la eda napoleonal, ci ia organiza la rituo funeral de Gudin e ia descrive la loca. Los ia segue alora un plu raconta de atestor cual ia gida los a la caxon de lenio.

An si la 400 mil soldatos en la Armada Grande de Napoleon ia avansa rapida en Rusia e ia catura Moscva, los ia es obligada a retira se en la inverno dur.

Plu temprana en la anio presente, en un rituo en Rusia ueste, on ia entera la corpos de 120 soldatos franses e rusce, tre femes e tre xicos adolesente ci ia mori en acel retira de Moscva. On crede ce la femes ia furni comedas e aida prima a la soldatos, e la xicos ia servi como tamburistes.