Filos longa a gasolinerias brites

En la Rena Unida, la armada prepara se per aida pos un dia cuatro de filos longa a gasolinerias.

Asta 150 soldatos va es instruida a trae gasolina a pompas aora vacuida par persones ci ia panica sur un manca de gidores de tancadores en la pais, an si on ave no manca de carburante a la refinerias. La instrui ocupa sinco dias.

Filos ia estende tra multe cilometres estra alga gasolinerias, e persones ia espeta tra oras per repleni sua tances. Alga motoristes ia dormi en sua autos, e otras ia atenta evita la filos par segue tancadores arivante.

Aora la compra panicada comensa gradal redui, car la plu de motoristes ave denova un tance plen.

On estima ce la Rena Unida ave un manca de plu ca 100 mil camionores, un situa cual en menses resente ia crea problemes per industrias diversa, incluinte furnores de comables e supramercatos.

De venerdi, la custa de gasolina sin plomo en la pais ia alti par un sentim, ateninte un recordo de oto anios. Un pico de vendores leva sua custas entre la compras estracomun.

Entretempo, on urje ce laborores esensal, como empleadas de cura medical e sosial, ta reseta prima la gasolina do lo es disponable.

La governa ia autori ance un estende a lisensas spesial cual permete ce un camionor transporta carburantes e benes simil, e ia anunsia visas tempora (asta natal) per 5000 camionores stranjer. Criticores dise ce cuasi nun va abandona sua emplea permanente en Europa per un posto tan tempora.

Fatores contribuinte a la manca de camionores inclui Brexit, la pandemica, salarios basa e la jubila de laborores vea.