Du trenes colide matante en Misre

A la min 32 persones ia es matada e 165 ia es ferida en un colide de trenes en Misre sentral.

Vagones ia es desrelida e inversada cuando du trenes de pasajor ia colpa lunlotra prosima a la site Tahta en la provinse Sohag.

La Autoriosa Ferovial Misri ia dise ce frenos de crise ia es ativida en la tren anterior par “individuas nonconoseda”, tal ce la tren seguente ia colide.

Presidente Abdel Fattah el-Sisi ia promete un puni forte a la persones culpable. “Cualcun ci ia causa esta asidente dolosa par nonatende o malvole, o cualce razona simil, debe reseta un puni preveninte sin eseta o retarda,” el ia tuita.

La colide ia aveni a sirca 365 cilometres a sude de Qahira, la capital. Un de la trenes ia viaja entre Luxor e la porto mediteranean Alexandria, e la otra ia vade entre Qahira e la site Aswan en Misre sude.

Plu ca 70 ambulansias ia es enviada a la loca per prende persones ferida a ospitales.

Un om ala ia comenta: “Nos nesesa ce un ofisior veni per vide lo cual ia aveni. On no pote estrae la persones de su la trenes.” El ia ajunta ce un gru va es nesesada. “Persones es mor. Nos no pote salva an los ci vive.”

Fotos mostra vagones inversada a lado de un canal de acua.

Mostafa Madbouly, la ministro xef, ia visita la loca, prometente compensa finansial a la familias de la vitimes. El ia dise ce la governa va continua renovi la ferovias per preveni asidentes simil desastrosa.

Misre ia esperia multe asidentes en sua sistem ferovial, partal par causa de un manca de manteni e investi. Un de la plu graves ia aveni en 2002, cuando 373 persones ia mori pos la ensende de un focon en un tren viajante a sude de Qahira.