Derek Chauvin es culpable de la omiside de George Floyd

En la Statos Unida, un juria ia judi ce un polisior pasada es culpable de omiside George Floyd, un om afroamerican, sur un strada de Minneapolis en la stato Minnesota en la anio pasada.

Derek Chauvin, ci ave 45 anios, ia ajena sur la colo de Floyd tra plu ca nove minutos en aresta el en maio. La metraje filmada de esta ia provoca protestas tra la mundo contra razisme e la usa esedente de forsa par la polisia.

Chauvin ia es judida como culpable a tre acusas: omiside de grado du, omiside de grado tre e mata sin intende. Sua libria su garantia ia es instante revocada e el ia es arestada. La condena va aveni probable pos du menses, e el va spende cisa desenios en prison.

La 12 membros de la juria ia pasa min ca un dia en ateni sua deside, cual ia segue un litiga emosiosa de tre semanas. Sentos de persones estra la corte ia aclama cuando la judi ia es anunsiada.

La avocato per la familia Floyd ia dise ce esta es “un punto de cambia de istoria” per la SUA. “Justia ganiada con dole ia ariva final,” el ia tuita. “Lo envia un mesaje clar sur la nesesa de respondosia en la enforsa de lege.”

Presidente Joe Biden e vispresidente Kamala Harris ia telefoni a la familia, direta pos la anunsia de la deside. Biden ia dise ce “a la min aora on ave alga justia”, ajuntante: “Nos va reali multe plu. Esta va es la turno prima de trata vera la razisme sistemal.”

Corta a pos, en comentas nasional televisada, Biden ia dise: “Razisme sistemal es un manxa sur la alma de la nasion intera.”

Harris ia recomenda ce legores aproba la lege George Floyd cual intende reformi la sistem de polisi en la pais. “Esta lege es un parte de la lega de George Floyd. Esta labora veni ja multe tarda.”

La federa polisial de Minneapolis, un organiza nonprofitante cual representa la polisia, ia grasia la juria per sua “labora dedicada” portante “un carga enorme”.

“Nos vole ance comunica a la comunia e espresa ancora nosa regrete profonda per sua dole, car ance nos senti lo a cada dia,” la federa ia dise. “On ave no vinsores en esta caso e nos respeta la deside de la juria. Nos nesesa un sesa de tentas political e de la molesta razal de ofisiores elejeda.”

On previde ce Chauvin va apela contra la judi. La plu probable, la avocatos defendente va dise ce la juria ia es cisa influeda par la publicia vasta de la caso.

La judor presidente Peter Cahill ia dise a lundi ce la comentas publica par Maxine Waters, congresor democrata, en la fini de semana pasada, es un razona posible per apela. Waters ia urje protestores a “resta sur la strada” e “deveni plu frontinte” si on ta remete Chauvin.