Cornelis George Boeree (1952-2021)

Con tristia profonda, nos anunsia la mori de George Boeree, la creor de elefen. El ia ave 68 anios.

Jorj ia nase en Nederland, en la vila peti Badhoevedorp prosima a Amsterdam, a 15 janero 1952, fio de Eberdina van Olffen e un otra Cornelis George Boeree. En desembre 1956, el ia traversa la Mar Atlantica con sua jenitores e frate per abita sur Isola Longa en la SUA, a la costa de la stato York Nova. Ala, como enfante joven, el ia aprende engles, en ajunta a sua lingua prima, nederlandes.

Pos studia italian e esperanto en pasa un estate en Australia, Jorj ia dirije sua mente creosa a la idea de desinia sua propre lingua aidante internasional en 1965. Inspirada par un teatral de Molière cual presenta alga linias de sabir – la creol parlada par marinores e mercatores en la Mediteraneo tra multe de la milenio du – el ia desira produi un sistem simple ma ance bela e natural. El ia dedica multe tempo a prepara un vocabulo con formas estetical plasente.

Jorj ia studia ance franses en sua liseo, de cual el ia gradua en 1969 con intende de deveni un arcitetor. En 1972, el ia sposi Judy Kovarik e los ia reloca se a Pennsylvania, ancora en la norde-este de la pais. Pos du plu anios, Jorj ia gania un diploma laural de psicolojia a la Universia Statal de Pennsylvania, e en 1979 e 1980 el ia progresa a diplomas de mestre e dotor a la Universia Statal de Oklahoma, spesialinte sur aspetas filosofial de psicolojia.

El ia deveni pronto un profesor a la Universia de Shippensburg, Pennsylvania, instruinte studiantes sur teorias de personalia e sur la istoria de psicolojia, entre otra temas. En sua carera de tredes anios, Jorj ia scrive multe sur psicolojia e budisme en la interede, e ia crea la testos prima enlinia de aprende psicolojia sin custa. Multe de esta obras ia es traduida a otra linguas, incluinte deutx, espaniol e balgarsce.

Sua desira per crea un lingua aidante ia es reveliada cuando el ia ensenia un curso de psicolinguistica, e pos alga plu anios de labora a lo, el ia deside final publici sua “lingua franca nova” en la interede en 1998. La lingua ia atrae rapida un bon cuantia de aprendores ci ia aida Jorj a developa plu la gramatica e vocabulo tra la du desenios seguente.

Jorj ia jubila en 2010, a la aniversario 58 de sua nase, ma ia manteni sempre sua interesa a psicolojia, filosofia e linguistica. En esta anios, el ia labora asidua per scrive articles ensiclopedial en elefen, prima en la vici de la comunia, e a pos en la Vicipedia elefen cuando esta ia abri en 2018. El ia tradui ance multe cantas, poesias e otra leteratur a elefen, como Leteras de la Tera par Mark Twain, Re Lear par Shakespeare, e, en 2019, sua propre obra grande La istoria de psicolojia.

A martedi 5 janero 2021, Jorj ia mori de canser de pancreas, en sua casa en Pennsylvania longo sua prefere, con sua sposa e du de sua tre fias. La comunia elefen ofre compatia sinsera a la familia. Inspirante a multe, el ia parti vera tro temprana de esta mundo. Reposa en pas, Jorj.