Arestas a la festa de maio en Turcia

La polisia turces ia aresta plu ca 200 persones ci ia fa protestas nonpermeteda a la festa de maio, un dia de asemblas tra la mundo an su la sperde continuante de covid.

La protestores en Istanbul, la site la plu grande de Turcia, ia rompe restrinjes poneda per preveni un onda tre de la maladia.

Prosegues gidada par laborores e sindicatos aveni a 1 maio en cada anio como parte de la selebras de la Dia Internasional de Labora en multe paises.

En esta anio, la asemblas ia aveni contra la fondo de un pandemica cual ia destrui modos de susta e ia impedi economias tra la mundo intera. En multe paises, polisiores ia es postida en cuantias grande per maneja un desordina posible e per serti ce on segue la restrinjes de covid.

Asemblas reduida ia aveni en Colombia, Cuba, Deutxland, Espania, Indonesia, la Pilipinas, la Rena Unida, Rusia, Sveria, e multe otra paises. La plu de la protestas ia es pasosa. Ma Turcia ia es un de alga paises do los ia deveni violente.

212 persones ia es arestada cuando los ia separa de la marxa e ia atenta entra a Plaza Taksim, un loca simbolin de protesta. Imajes mostra un sena caososa en cual polisiores ia usa sua scermos per repuxa la fola e ia tira alga protestores a via de la plaza.

En Frans, a la min 46 persones ia es arestada en la capital, Paris, cuando protestores ia combate polisiores antitumultal, lansante petras, rompente fenetras e ensendente baldones.

Plu ca 106 mil persones ia prosegue a sirca 300 asemblas organizada en Paris e otra sites. La protestores ia vosi sua oposa a la intende par la governa de cambia la aida sosial per persones nonempleada. Los ia esije un justia economial.

On ia oia esijes simil en Deutxland, do protestas de la festa de maio ia aveni tra la pais, an pos la introdui de regulas plu sever contra covid en la semana pasada.

En la capital, Berlin, miles de polisiores ia monitori protestas plural, incluinte un cual ia es organizada par un grupo oposante la stratejia de la governa contra coronavirus.

Sirca 10 mil siclistes ia reali un protesta pasosa contra capitalisme. Ma a la comensa de note, la umor ia deveni tensada cuando protestores ia ensende paradores e ia fronti la polisia.

A un asembla en Jakarta, capital de Indonesia, protestores ia pone tombas falsa sur la strada per simboli la cuantia de persones matada par la pandemica.

La selebras ia es nonusual cuieta en Cuba, do laborores asembla tipal per avenis grande per recorda la revolui comuniste cual ia dona la potia a Fidel Castro en 1959.

Ma per la anio du en serie, Cuba ia cansela sua prosegue tra la Plaza de la Revolui en Havana, en ce la pais batalia covid e un crise de economia. En loca, un cuantia peti de xefes nasional ia asembla a locas publica sin folas, e on ia recomenda ce sitadanes selebra a casa.