64% de votores swiz suporta sposis ge

Cuasi du tris de votores swiz ia suporta sposis omosesal en un referendo. Swiz deveni un de la paises final en Europa ueste cual ia legali tal sposis, e la nasion 30 de mundo cual ia aseta los.

Promovores ia saluta la resulta como un momento monumentin per diretos LGBT en la pais.

Ante la vota, organizas eglesal e partitos political conservaliste ia oposa la idea, disente ce lo va perili la familia tradisional.

De 2007, Swiz permete duples ge a rejistra sua asosias, ma alga diretos es restrinjeda. La resulta de la referendo va permete ce duples ge adota enfantes nonrelatada e ce sposes lesbian ave enfantes par dona de spermas.

Karin Keller-Sutter, ministro de justia, ia dise ce la sposis omosesal prima va aveni en julio de la anio veninte. “Los ci ama lunlotra e vole sposi va pote sposi,” el ia dise, “sin depende de esce los es du omes, du femes o un om e un fem.”

Ma Monika Rüegger, politiciste destriste con la Partito de la Popla Swiz e un oposor de la cambia, ia dise ce enfantes e padres va perde. “Esta no ia conserna la ama e sentis,” el ia comenta. “Lo ia conserna la bonstate de enfantes.”

En la 20 anios pasada, la plu de paises en Europa ueste ia reconose sposis omosesal. An tal, en Swiz, multe desides grande pasa tra un vota nasional, e esta pote lenti cambias importante a leges sosial.

La lege nova, cual ia es suportada par la governa swiz e tota partitos political major estra la Partito de la Popla, ia es asetada par la parlamento en desembre. Ma oposores ia apela, coliente un cuantia sufisinte de suscrives per obliga un referendo.