Zuckerberg recomenda regulas plu forte

La xef de Facebook, Mark Zuckerberg, ia recomenda regulas plu forte contra mal contenidas enlinia, disente ce companias como la sua no debe fa desides sur la libria de parla.

Referente a Xina, el ia averti ance ce par controla tro multe, on risca sufoca espresas individual. El ia parla a la Confere de Securia en München, Deuxtland.

La jigantes de rede sosial, como Facebook, es sempre plu presada per preveni la sperde de informa falsa. Facebook es spesial criticada per sua disposa a anunsias political.

La compania ia inisia regulas nova per anunsias political en la SUA en 2018, e global en la anio seguente. Esta regulas esije ce tal anunsias revela ci ia paia per los, e un copia de la anunsia es retenida en un banco de datos, publica xercable, per sete anios.

Ma en esta semana, Facebook ia dise ce lo no va inclui postas political en sua banco de datos si los es sponsorida par persones famosa de redes sosial. Ance la veria de postas par politicistes no es sempre controlada, como parte de la regulas de la compania sur libria de parla.

A la confere, Zuckerberg ia dise: “Nos no vole ce companias privata fa tan multe desides sur la ecuilibra de justia sosial sin plu prosedes democrata.”

El ia urje governas a inventa un sistem nova regulante per redes sosial, sujestante ce lo debe es un misca de regulas esistente per companias de telecomunica e difusa.

“Con la manca de tal regula, nos va continua fa la plu bon cual nos pote,” el ia comenta. “Ma vera me pensa, a multe de esta demandas cual atenta ecuilibra justias sosial diversa, ce lo no es mera un caso de reveni con la bon responde, lo es un caso de reveni con un responde cual la sosia regarda como valida.”

Zuckerberg ia confesa ance ce Facebook ia reconose lenta la developa de “campanias de informa” coordinada enlinia par statos como Rusia. El ia ajunta ce tal “atores malvolente” deveni ance plu capas de asconde sua trasas par masci la adirijes IP de usores.

Per combate esta, el ia dise ce Facebook ave un ecipo de 35 mil persones ci analise contenida e securia a sua plataforma. Con aida de inteleto artifis, el ia indica, plu ca milion contas falsa es sutraeda a cada dia.

An con la contrareata publica a temas como anunsias political, Facebook afirma ce la cuantia de usores de sua familia de sistemes – Facebook, Messenger, Whatsapp e Instagaram – continua crese. Plu temprana en esta mense, Whatsapp ia anunsia ce lo es usada par plu ca du mil milion persones, plu ca un cuatri de la popla de la mundo.