AORA OJI
Novas de la mundo, simple reportada en elefen
2021 · 2020 · 2019 · 2018 · 2017 · 2016 · 2015 · 2014 · 2013

Un tomba coletiva criminal es trovada en Mexico

15 janero 2020

En Mexico ueste, on ia trova la corpos de 29 persones a la min, en un tomba coletiva a borda de la site Guadalajara. Lo es prosima a du otra tombas nonprofonda en cual 81 corpos ia es trovada en la anio pasada.

En la semana pasada, Mexico la revisa la cuantia de persones ci ia desapare pos 2006, de 40 mil a 60 mil. On crede ce multe de los ia es matada par la ganges criminal potiosa en la pais, e sua corpos ia es dejetada en tombas tempora.

Ofisiores ia dise ce asta aora los ia susede identifia cuatro de la 29, e ce los ia parteni a persones reportada como mancante. Probas forense continua a la corpos restante.

Tota tre tombas ia es descovreda pos un invade par la Garda Nasional de Mexico a un beneria en Toluquilla, un vila prosima, a 6 novembre. Los ia es en patrulia normal de la distrito cuando los ia vide omes armada estra la beneria.

Entrante a la construida, los ia trova oto persones tenida par la pistolores, e ance un colie grande de armas. Los ia aresta 15 persones, de ci tre ia es nonadulte, e informas furnida par los ia gida a la tre tombas en un cultiveria local.

La descovre de tombas coletiva en Mexico no es noncomun. En la des-tre menses entre 1 desembre 2018 e 31 desembre 2019, on ia desentera plu ca mil corpos de tombas secreta.

On crede ce alga ia es membros de ganges, matada o par sua propre gang per ofendes suposada, o par ganges competente. Otras ia es saisida per rescate, e matada cuando sua relatadas no ia pote paia. Ancora otras ia mori car los ia entra a teritorio controlada par un gang, o car un grupo criminal ia vide los como menasas.

An si la tombas es xef descovreda en rejiones campanial, corpos ia es ance dejetada en casas en Guadalajara, car criminores sabe ce la xerca de imobilas privata es plu difisil per la polisia.

En novembre, la governa de presidente Andrés Manuel López ia crea un pajeria enlinia do on pote reporta persones mancante, como un atenta de oteni un statistica plu esata sur la cuantia de tales.

Esta paje es presentada con la lisensa CC Attribution-Share Alike 4.0 International.
Lo ia es automatada jenerada de la paje corespondente en la Vici de Elefen a 10 novembre 2021 (17:34 UTC).