Un sonda risca perde sua sample de asteroide

Un sonda spasial, enviada par NASA per colie roca de un asteroide a 320 milion cilometres de la Tera, ia saisi tan multe materia ce lo perde alga de sua sample.

Ofisiores de la sonda OSIRIS-REx, cual ia atera sur Bennu en la parte plu temprana de esta semana, dise ce la opera de colie ia susede cisa tro bon.

Imajes reenviada a la Tera mostra ce un petra teni abrida la porte de un contenador, cual gotea donce alga de sua contenidas. NASA atenta aora coreti la problem.

On crede ce la veculo ia colie sirca 400 grames de fratos de roca.

“La tempo es la esense,” Thomas Zurbuchen, dirijor asosiada per siensa de NASA, ia comenta en cuando la ajenteria spasial foca a serti ce on no perde plu.

La contenador de coliedas va es aora tenida a interna de la veculo. Per esta razona, on no va pote mesura esata cuanto materia ia es prendeda.

“An si nos va debe cisa ata plu rapida per securi la sample, esta no es un problem grave,” Zurbuchen ia ajunta. “Nos es tan stimulada per vide lo cual pare es un sample abundante cual va inspira la siensa tra desenios pos esta momento notable.”

OSIRIS-REx ia atera sur Bennu, un asteroide larga de sola 500 metres, a martedi. Lo ia puxa multe polvo e detrito a supra cuando lo ia prende samples de la surfas de esta ojeto sielal. La rexercor xef de la mision, Dante Lauretta, ia nota alora: “Vera nos ia fa alga desordina.”

Siensistes espera ce la projeta va aida esplica como la sistem solal ia comensa a 4,5 mil milion anios ante aora, cuando on va esamina la samples pos la reveni de la sonda a la Tera en 2023. Asteroides conteni detrito restante de la formi de la sistem.

OSIRIS-REx ia es lansada en 2016 e va comensa sua viaja de reveni en marto. Sua nom es la acronim de “Orijinas, Interprete Spetral, Identifia de Recursos, Securia, Esploror de Regolito” en engles.