AORA OJI
Novas de la mundo, simple reportada en elefen
2021 ·
2020 ·
2019 ·
2018 ·
2017 ·
2016 ·
2015 ·
2014 ·
2013
23 april 2020
La compania esuan Zoom ia dise ce en esta semana lo va relasa un varia bonida de sua ap estrema popular de confere video.
Esta segue esaminas intensa a problemes en la securia e privatia de la ap. La compania ia dise ce Zoom 5.0 va inclui metodos novida de sifri per aida proteje datos e preveni ce persones noninvitada intrui – un fenomeno nomida “bombi de Zoom”.
La plataforma es aora usada par sentos de miliones de persones tra la mundo per labora e osio en sua enclui a casa par la coronavirus.
On ia critica Zoom per problemes variosa de privatia, incluinte ce lo envia datos de usor a Facebook, ce lo ia declara falsa ce sua comunicas es sifrida de punto a punto (pd. nondesifrable par un ajente media), e ce lo permete ce ospitores de conferes trasa la partisipores.
Un de la problemes la plu reportada es casos de “bombi”, cuando persones noninvitada intrui a conferes. Per esta razona, alga companias, scolas e governas ia abandona sua usa de la plataforma.
Plu temprana en esta mense, Zoom ia dise ce lo va pausa la developa de cualias nova per consentra a la problemes de securia e privatia.
Eric Yuan, xef de la compania, ia demanda per pardona sur la “nonsasia” relatada con tal problemes e ia promete reata a la consernas, disente ce la usa de la ap ia crese en modos cual el ta previde nunca ante la pandemica.
La cuantia de usores dial ia aumenta de 10 milion asta 200 milion en min ca tre menses.
Esta paje es presentada con la lisensa CC Attribution-Share Alike 4.0 International.
Lo ia es automatada jenerada de la paje corespondente en la Vici de Elefen a 11 agosto 2024 (12:42 UTC).