Un monolito misteriosa en la deserto de Utah

A lundi, ofisiores en Utah, stato esuan, ia revela la descovre de un monolito strana de metal en la profonda de la deserto de roca roja. Los ia refusa indica la loca esata, esperante preveni ce aventurores atenta trova lo e deveni perdeda.

Ma ja ier, imajes ia apare en Instagram de persones a lado de la strutur, de cual sua presentia es ancora misteriosa. Los ia es aidada par los ci ia identifia rapida la monolito en Google Earth e ia posta la coordinadas.

Ofisiores statal per viventes savaje ia vide prima la ojeto a 18 novembre cuando los ia vola en elicotor supra esta tereno distante per conta oveas. Tim Slane, ci ia posta la coordinadas, ia dise ce el ia trasa la curso de la elicotor asta sua desapare de radar, indicante ce cisa lo ia atera.

Alora el ia scane la mapa per la cualias esata de la tereno videda en la fotos e videos ofisial de la monolito, ante trova un canion cual ia conteni un ombra distinguida longa e streta. On no vide la ombra en imajes de satelite de 2015, ma lo apare en otobre 2016 cuando lo pare ce arboretas visina ia es sutraeda.

Multe persones ia sujesta (bromante, per la plu) ce la strutur ia es erijeda par visitores estrateran, ma la teoria dominante es ce lo es un obra de arte consetal ancora nonreclamada.

Prima, espertas ia sujesta ce lo es un obra nonconoseda par John McCracken, un artiste minimiste ci ia mori en 2011, ci ia crea multe scultas de plances. Sua galeria ia confirma inisial esta, ma ia retira la dise a pos, espresante sua crede ce la strutur es un onora a el par un otra artiste.

On ia considera ance Petecia Le Fawnhawk, ci instala scultas totemin en locas secreta de deserto, e ci ia abita e labora en Utah en la pasada. Ma el ia dise ce an si el “ia ave la pensa de planta monumentos secreta en la deserto”, el no pote reclama esta obra.

La Departe de Securia Publica per Utah ia dise ce lo no promove viajas a la monolito par causa de la periles posible, ma la area es tereno publica, donce lo no pote preveni persones ci vole visita lo. On ia fa no deside per desasembla lo.