Un lege proposada per reformi la polisia esuan

Democratas en la parlamento de la SUA ia proposa un lege major per reformi la polisia de la pais, pos semanas de protestas contra cruelia e razisme polisial. La lege ta fasili litiga polisiores per malcondui, e ta fronti razisme.

Esta ia aveni en cuando legores en Minneapolis ia promete desbandi la polisia de la site. La mori de George Floyd par la atas de un ofisior de pel blanca ia crea un presa nasional per cambia.

An tal, lo es nonclar esce la republicistes, ci controla la Salon Alta, va suporta la lege proposada, nomida la Lege de 2020 per Justia en Polisi. Presidente Donald Trump ia tuita ce “la Democratas Revoluinte Sinistra vole Desfinansia e Abandona nosa Polisia. Pardona, me vole LEGE E ORDINA!”

La frate de Floyd va atesta a la Salon Basa, plu tarda en esta semana, en un escuta sur reformi la polisia.

Proposante la lege ier, Nancy Pelosi, presidente de la Salon Basa, ia leje la nomes de omes e femes de pel negra ci ia mori par la atas de la polisia en anios resente.

La lege ta obliga ce la polisia federal usa cameras de corpo e auto, ta proibi la teni strangulante de persones, ta elimina invades nonanunsiada par la polisia, ta fasili ce on litiga la polisia per violes de diretos sivil, e ta recomenda ce on reteni la finansia federal de fortes de polisia local ci no fa reformis simil.

Plu, la lege ta fa ce linxas deveni crimines federal, ta limita la vende de armas militar a la polisia, e ta dona a la Departe de Justia la autoria per investiga la polisia de stato o plu local per indicas de prejudi o malcondui vasta. Lo ta crea ance un arcivo nasional de malcondui polisial – un banco de datos sur cexas contra la polisia.

Alga xefes republiciste ia dise ce los va considera la posible de proposa sua propre lege, con un escuta projetada per la semana seguente par la comite judinte en la Senato. Ma la membros de la partito de Trump esita jeneral siniali sua suporta per tal leges.

Rompente de sua partito, Mitt Romney, senator republiciste, ia tuita imajes de se en un prosegue en dirije a la Casa Blanca con protestores cristian a soldi, con la testo “Vives Negra Importa”.