Un barcon de turi viaja denova en la Mediteraneo

La barcon prima major de turi en la Mediteraneo en cuasi sinco menses ia parti de Genova en Italia.

La MSC Grandiosa va visita tre portos italian e Valletta, la capital malti, en un viaja de sete dias. Sua compania dise ce tota pasajores e ecipores ia es probada per coronavirus ante embarca.

La cuantia de casos de la virus continua crese tra Italia. La autoriosas ia comanda ce tota danserias e locas de note clui de oji. Mascas de fas va es ance obligada de 18:00 a 06:00 en spasios publica do on no pote distanti sosial.

La compania MSC Cruises va opera la Grandiosa a sirca 70% de sua capasia normal, con sirca 2500 pasajores, per serti la securia.

On regarda sua parti como la paso prima en reinisia un industria cual jenera $150 mil milion per la economia de mundo, como estimada par la Asosia Internasional de Companias de Barcones de Turi.

Per Italia, grava afetada par coronavirus, lo es spesial importante. La pais ocupa la loca sete entre la nasiones cual opera barcones de turi, e lo ia porta plu ca 800 mil pasajores en 2018.

En la semana pasada, la governa italian ia permete ce companias de turi recomensa funsiona en la pais de 15 agosto.

Un plu barcon de la mesma compania va parti de Bari en la sude-este de Italia a 29 agosto, ma la organiza ia suspende tota sua otra turis asta la media de otobre.

La pandemica ia causa perdes finansial grande a la industria internasional de turi. Alga companias ia es ance criticada pos lasa miles de pasajores trapida en barcones en Asia e la SUA en la menses temprana de la maladia.

MSC Cruises ia comenta ce sua regulas nova de securia, cual inclui probas dial de la temperatur de la embarcadas, esede la normas per la nasion e la industria. Ma la viaja de la Grandiosa va es un esperimenta major entre la ansia restante sur securia de pasajores.

A la fini de julio, la compania peti norsce Hurtigruten ia debe suspende sua servi nova recomensada, car deses de pasajores e ecipores ia es positiva probada per la coronavirus.