Un apico subita de casos de coronavirus en Beijing

Beijing ia rejistra ier 36 casos nova e local comunicada de la coronavirus, e on teme la aveni de un onda du en la capital xines. 36 casos nova ia es rejistrada ance a saturdi, pos 6 a venerdi e 1 a jovedi. Ante esta, la site ia vide no casos nova en plu ca sincodes dias.

On ia asosia la eruta nova con la mercato la plu grande de vende major en la site. 79 casos ave un relata con la mercato Xinfadi.

Tre otra provinses – Liaoning, Hebei e Sichuan – ia reporta ance casos confirmada o suspetada con lias a Beijing.

La virus ia es descovreda sur plancetas de axi usada per salmon emportada a la mercato, provocante ce supramercatos grande en Beijing sutrae esta pexes de sua scafales.

On ia enclui rapida la mercato e ia pone restrinjes a des-un distritos visina. No visitores o traes es permeteda, ma abitores pote entra e sorti. On ia comanda la clui de scolas e prescolas prosima a la mercato, e ia pospone la reabri de scolas prima, intendeda per oji.

Des mil empleadas de la mercato va es probada per la virus.

La epidemiolojiste xef de la Sentro per Controla e Preveni Maladia, en Xina, ia dise ce la virus trovada en Beijing no sembla la tipo cual sirculi en la resta de la pais, sujestante ce lo ia es introduida de estra la pais.

Esta serie de casos ia apare cuando on ia recomensa la vive normal en Beijing e la plu de Xina. Persones ia revade cauta a sua locas de labora, e studiantes a sua scolas, an con restrinjes restante contra la virus.