Txile vota per rescrive sua constitui

Txilanes ia vota per rescrive sua constitui, cual ia orijina en la eda de la jeneral autocrata Augusto Pinochet.

Con cuasi 90% de la votas contada, 78% de persones ia vota “si” en un referendo cual ia aveni pos protestas coletiva contra nonegalia.

Presidente Sebastian Piñera ia reconose la resulta e ia loda la prosede pasosa, descrivente lo como “la comensa de un via longo cual tota nos debe pasea en junta”.

Un promove antigovernal ia comensa en Txile a un anio ante aora. Un de sua esijes inisial ia es ce la pais nesesa un constitui nova per repara nonegalias profonda en sua sosia.

“Asta aora, la constitui ia divide nos,” Piñera ia dise en cuando persones ia selebra sur la stradas. “De oji, tota nos debe colabora afin la constitui nova es un strutur grande de unia, stablia e la futur.”

La referendo ia fa du demandas a txilanes: prima, esce los desira un constitui nova, e du, par cual spesie de autoriosa los ta vole ce lo es preparada.

Un majoria grande ia espresa sua desira ce la constitui nova ta es desiniada par un asembla intera composada de sitadanes elejeda, en loca de un cual inclui ance legores.

Miles de persones ia comensa selebra en Santiago e otra sites an ante cuando la resulta ia deveni clar. On ia predise ce la resulta va es “si”.

La nivel de povria ia cade multe en Txile en la du desenios pasada. Aora lo es la pais la plu rica de America Sude, per person. Ma lo es ancora un de la nasiones la plu nonegal de mundo. Multe culpa un sistem cual ia privati partal la servis publica.

La constitui presente ia es preparada en 1980 pos un referendo su Jeneral Pinochet, de ci sua rena militar de 17 anios ia es marcada par represa, tortura e desapares.

On ia intende inisial fa esta referendo nova en april, ma lo ia es posponeda cuando txilanes ia isoli se par causa de la pandemica.

Un asembla constitual de 155 membros va debe es elejeda ante april 2022. La asembla va ave un anio per acorda un testo ru, sur cual la popla va vota denova.