Tre spesies umanin ia coesiste en Africa antica

Un studia mostra ce a du milion anios ante aora, tre spesies diferente de umanines ia coesiste en Sudafrica. Esta suporta la comprende cresente ce la situa presente, con ce sola un spesie umana domina la globo, es cisa nonusal en compara con la pasada evolual.

La indicas nova veni de laboras per dati osos descovreda a un sistem de cavas prosima a Johannesburg. La rexerca ia revela ance la esemplo la plu temprana conoseda de Homo erectus, un spesie sur cual on crede ce lo ia es un asendente direta de umanas moderna (Homo sapiens).

La tre comunias de umanines ia parteni a Australopithecus (la grupo famosa par la fosil “Lucy” de Itiopia), Paranthropus e Homo (umanas). On ia evalua restas trovada a la Cavas Drimolen, usante tre tecnicas de dati: spetroscopi par resona paramagnetal eletronal, paleomagnetisme, e dati par uranio–plomo.

La rexercores ia trova ce la escaveria xef a Drimolen, e tota la fosiles cual lo conteni, ave entre 2,04 e 1,95 milion anios.

Esta cavas ia produi ja multe fosiles, incluinte los de ominines antica. Ma a un pico de anios ante aora, esplorores ia descovre la partes superior de du cranios nova. La un ia parteni a la spesie relativa primitiva Paranthropus robustus. La otra ia aspeta plu moderna e ia es identifiada como Homo erectus.

Homo erectus ia es cisa la prima de la spesies umana temprana ci ia migra de Africa a la resta de la mundo.

Esta cranio es no sola la esemplo la plu temprana de la spesie en la mundo, ma lo es ance la sola esemplo de Sudafrica. Asta sua descovre, on ia suposa ce Homo erectus ia orijina en Africa este, ma cisa lo ia veni de la sude de acel continente, e ia pasa tra Africa este e norde en via a domina la mundo.

En la pasada, nos ia regarda la evolui umana como un progresa linial, con ce umanas moderna ia emerji a la fini como la zenite de developa. Ma lo deveni sempre plu clar ce la situa vera ia es multe min simple.

Un plu studia publicida en esta semana ia usa tecnicas moderna per dati un cranio bon conservada cual on ia trova en un escaveria a Kabwe en Zambia en 1921. La cranio es multe plu primitiva ca los de umanas moderna, ma plu avansada ca Homo erectus. Par sua anatomia, on ia suposa ce lo ave sirca 500 mil anios.

Multe rexercores opina ce lo parteni a un spesie nomida Homo heidelbergensis, un asendente comun de umanas moderna e neandertalanes. Ma la siensistes ci ia dati aora samples peti de sua oso e dentes ia mostra ce lo es multe plu joven, con entre “sola” 324 mil e 276 mil anios.

La descovre implica ce a la min tre spesies diferente de Homo ia coesiste en Africa a acel tempo.

En ancora un plu publici importante sur evolui umana en esta semana, rexercores ia analise protenas antica de fosiles de Homo erectus con 1,9 milion anios, trovada a Dmanisi en Sacartvelo, e de un spesie nomida Homo antecessor, sur cual on crede ce lo ia esiste en Espania entre 1,2 milion e 800 mil anios ante aora.

La analise ia forti la lias entre la du spesies e otra umanines per ci nos ave datos ADN. La usa de protenas aida grandi nosa sabes sur relatas evolual a ultra la edas per cual la oteni de indicas ADN deveni difisil par causa de la desintegra de acel molecula.

La studia ia revela ce Homo antecessor, de cual on ia duta sua validia como un spesie separada, es un conaseda de umanas moderna e otra spesies Homo resente, como la neandertalanes e la denisovanes.