Siensistes vide estrema detaliosa la surfas de la Sol

La Telescopio Solal Daniel K Inouye (DKIST) en Hawaii ia relasa imajes mostrante cualias con diametre tan peti como 30 cilometres, a la surfas de la Sol.

Esta strutures selulin es aprosima tan grande como la stato Texas en la SUA. Los es masas convetante de plasma – un gas calda de iones. On vide sentros briliante do la materia de sol leva, ensircada par bandetas oscur do la plasma fri e basi.

DKIST es un compleso intera nova, locada a la culmina de Haleakalā, un volcan alta de 3000 metres sur Maui, un isola hawaian. Sua miror xef, con diametre de 4,24 metres, es la plu grande de mundo per un telescopio solal.

On va usa la oserveria per studia la funsiona de la Sol. Siensistes desira comprendes nova sur sua condui dinamical, esperante ce los va pote predise plu bon sua erutas enerjiosa, a cual on refere comun como “la clima spasial”.

A veses pasada, emetes enorme de particulas cargada e sua campos magnetal ia dana satelites sirca la Tera, ia afeta astronautas, ia mali radiocomunicas, e ia descomuta an redes eletrical.

Matt Mountain, presidente de la Asosia de Universias per Rexerca en Astronomia, cual maneja la telescopio, ia comenta: “Nosa predises es plu retardada ca per la clima teral par 50 anios, o an plu. Nos nesesa comprende la fisica fundal de la clima spasial, e esta comensa a la Sol.”

DKIST va colabora eselente con la Orbitador Solal, un oserveria spasial cual on va lansa de Capo Canaveral en Florida en la semana veninte.

Esta sonda, de Europa e la SUA en junta, va fa fotos de la Sol de la punto la plu prosima en istoria – a mera 42 milion cilometres de la surfas, an plu prosima ca la planeta Mercurio.

Lo va vide cualias tan peti como 70 cilometres de diametre, ma va sensa lus a longias de ondas en un banda multe plu larga ca DKIST, e va sample plu stratos tra la atmosfera de la Sol. La sonda va vola ance longo un curso cual va ofre un vista nonpresededa de la rejiones polal.