Protestas pos la reindui secreta de Lucaxenca

Protestas grande continua en Minsk, la capital de Bielarus, pos la indui de presidente Aliacsandr Lucaxenca en un rituo nonanunsiada. On reporta bates e detenis par la polisia, e videos mostra ce canones de acua ia es usada.

Alga sentos de persones ia es presente a la indui de Lucaxenca per sua periodo ses en potia. Un oposor political ia descrive la aveni como un “reuni de furores”.

Oposores dise ance ce la vota en agosto ia es manipulada per favore Lucaxenca.

La comision elejal de Bielarus ia declara ce Lucaxenca ia gania plu ca 80% de la votas, provocante semanas de protestas coletiva tra la pais. Alga paises en la Uni European dise ce los no reconose Lucaxenca como un presidente legal.

Induis de presidentes es tipal preanunsiada como formales major de stato. En loca, un ajenteria governal de novas ia reporta ier: “Aliacsandr Lucaxenca ia emprende sua posto como presidente de Bielarus. La rituo de indui aveni en esta minutos en la Palasio de Nondepende.”

Lucaxenca, ci rena ja esta republica pasada soviet tra 26 anios, ia dise ce Bielarus nesesa securia e acorda “a la borda de un crise global”, un refere parente a la pandemica de coronavirus. “Me no pote, me ave no direto de abandona la bielarusces,” el ia ajunta.

En la ap de mesaji Telegram, un canal usada par oposores ia urje ce on protesta sur la stradas de 18:00, recomendante ce veculores bloci la vias per crea conjesta.

“Comensante de esta dia mesma, el [Lucaxenca] deveni ofisial un bandito e frodor ci no es reconoseda a cualce loca en la mundo sivilida,” la canal ia comenta.

A la sera, protestores ia prosegue a la sentro de Minsk. Alga ia porta coronas falsa per burla la indui, e un ia mostra un carton con la testo: “La re ave no vestes!” Ma multe polisiores ia es presente e alga persones ia es detenida.

La oposor political xef de Lucaxenca, Svetlana Tihanovskaia, ci ia fuji a Lietuva per evita es arestada, ia dise: “Pos oji, el es un xef no legal, no autentica de Bielarus”. Longo se, Tihanovskaia ia gania 60% o 70% de votas en locas do estas ia es coreta contada.