OTAN rejeta ce soldatos sta a la frontera de Bielarus

OTAN dise ce alegas par Alexander Lukashenko, presidente de Bielarus, ce “potias stranjer” organiza un cumula de soldatos a la frontera de la pais ave no funda.

Portante vestes militar, la presidente ia dise ce el ia pone sua fortes armada a “vijila alta”.

Protestas ia continua ier sur la stradas de Minsk pos un vota disputada a du semanas ante aora. La protestores esije la resinia de Lukashenko, ci ia governa Bielarus tra 26 anios.

El ia dise ce la bloco de OTAN atenta divide Bielarus per instala un presidente nova en Minsk. El ia ajunta ce soldatos en Polsce e Lietuva prepara se, e ce el move sua propre fortes armada a la frontera ueste de la pais.

OTAN ia rejeta esta, disente ce lo fa “no menasa a Bielarus o cualce otra pais, e ave no preparas militar en la rejion. Nosa posa es intera defendente.”

La presidente lietuvisce Gitanas Nausėda ia dise: “La governa atenta diverje la atende a via de la problemes interna de Bielarus, a cualce custa, par declaras completa sin funda sur menasas esterna imajinada.”

Un ofisior de la presidentia polsce ia descrive la sujesta ce Polsce intende causa un destabli a la frontera como “propaganda governal” par la bielarusces, ajuntante ce esta es “triste e surprendente”.

OTAN ia urje Bielarus a respeta la diretos umana fundal de sua sitadanes.

Lukashenko ia es reelejeda como presidente a 9 agosto, ma la prosede de vota ia es jeneral regardada como manipulada. Protestas per disputa la resulta ia fronti un reata savaje violente cual ia mata a la min cuatro persones. Protestores dise ce on ia tortura los en prisones.

La presidente ia promete supresa la turba, e ia culpa “revoluistes stranjer finansiada” per la disenti.

Ier, folas de protestas ia brandi luses briliante de sua telefonetas e ia mostra banderas bielarusce sur la stradas de Minsk, scandente “libria”. La polisia ia atenta sperde plu ca mil persones asemblada en la Plaza de Autonomia.

Plu temprana en la dia, un cadena ia formi de sentos de persones, de ci multe ia es blanca vestida, a la mercato Komarovka.

Esta segue la protesta la plu grande en la istoria moderna de la pais a la finisemana pasada, cuando sentos de miles de persones ia pleni la stradas.