On predise un futur de desastres natural per Australia

Un reporta longa espetada sur focones forestal en Australia dise ce la pais debe prepara se per un futur “alarmante” de desastres simultan e gravinte.

Entre otra desastres, la investiga ia esamina la ardes de la Estate Negra de 2019–20 cual ia destrui partes grande de la pais. A la min 33 persones ia mori en lo cual ia es un saison sin presedente.

La reporta fa plu ca 80 recomendas a la governa, incluinte proposas detaliosa per boni la responde nasional.

Repetente ce la cambia climal ia mali la state estrema cual ia causa la focones, la reporta projeta un futur an plu sever. La governa australian dise ce lo va considera la proposa en modo “atendente e metodosa”.

De julio 2019 asta marto 2020, flamas ia sperde tra 24 milion ectares de tera. Acel ia es la saison la plu intensa de ardes natural en Australia, an si no la plu matante.

La focones ia afeta cada stato de la pais, ia destrui plu ca 3000 casas, e ia mata o desloca cuasi tre mil milion animales.

Fuma ia covre areas vasta, incluinte la sites Sydney, Canberra e Adelaide a veses. Un studia ia relata 445 moris a la cualia perilosa de la aira, estimante ce esta ia ospitali ance miles de otra persones.

La focones estrema ia es frecuente noncontrolable e ia supralabora la pompores, ci es bonvolores per la plu. La ardes ia aveni en la anio la plu seca e calda en la istoria rejistrada de Australia, e ia segue un tempo seca longa. E a pos, alga comunias afetada ia esperia tempestas forte e inondas.

La Comision Reial sur Maneja Nasional de Desastres Nasional ia averti ce la caldi global es “nonevitable” en la du desenios veninte. La comisionores ia reporta ce “desastres composada” va deveni plu comun, en cual periles natural como focones, inondas e tempestas aveni simultan o direta pos lunlotra.

Promovores per salva la clima ia dise ce la governa australian e otras nesesa fa plu per redui emetes.

A la apico de la focones, alga siensistes ia espresa sua duta sur la politica climal de la governa de ministro xef Scott Morrison, sujestante ce lo no va ateni sua gol de redui emetes par 26% ante 2030.

Como suportor de combustables de fosil, incluinte carbon e gas, asta aora Australia ia resiste la presa ce lo ta junta se a la otra nasiones cual ia promete deveni neutra de carbono ante 2050.