Macron urje Lubnan a formi un governa nova

Emmanuel Macron, presidente de Frans, ia urje ce Lubnan formi rapida un governa nova pos la asinia de sua ministro xef nova. La ambasador lubnani pasada a Deutxland, Mustapha Adib, ia emprende esta rol, suportada par la plu de parlamentores.

Ofisiores major de Lubnan dise ce la arbitra par Macron ia es esensal en ateni un acorda sur la asinia.

La governa presedente ia resinia coletiva pos la esplode enorme en la capital, Beirut, a 4 agosto, cual ia mata a la min 200 persones. La esplode ia es causada par la reteni nonsecur de nitrato de amonio a la porto de la site.

Macro ia ariva en Beirut ier per sua visita du pos la esplode. On previde ce el va presa politicistes lubnani a fronti la sobornosia e la peri finansial.

Parlante a reportores, el ia dise ce un governa nova debe formi “tan pronto como posible”, como Adib ia promete ja. Ma en sua visita, Macron ia esperia protestores ci scande “no Adib”, indicante ce alga persones vide la asinia de Adib como un continua de la state esistente en la pais.

Protestores ia organiza asemblas grande tra Lubnan ja de otobre, esijente un cambion de la sistem political. La potia es jeneral fundida sur interesas setal, e un serie de governas ia es acusada de gida noneficas e elitiste. Asinias political e multe postos depende de parteni a un de la multe comunias relijial en la pais, e esta ia crea un situa plen de favorisme e sobornas.

Adib, ci ave 48 anios, ia deveni la ambasador de Lubnan a Deutxland en 2013. El ave un diploma dotoral de lege e siensa political, e ia ensenia a universias en Lubnan e Frans. El ia servi ance como conselor a Najib Mikati, ministro xef pasada de Lubnan.

Un grupo de ministros xef pasada, incluinte Saad Hariri ci gida la partito suni xef de la pais, ia anunsia ce lo aproba Adib pos considera alga nomes a soldi. Pos sua nomina, Adib ia dise ce on ave “un nesesa de formi un governa en tempo recordo e de reali instante reformis, comensante con un acorda con la Reserva Monal Internasional”.

Istorial, semanas o menses ia pasa ante la formi de un governa pos la indui de un ministro xef nova, ma la partitos ia indica ce los desira rapidi la prosede par causa de la situa presente.