La siensiste nucleal xef de Iran es asasinada

Iran ia promete venja contra la mata de sua siensiste nucleal xef, Mohsen Fakhrizadeh, ci ia es asasinada prosima a Tehran ier. El ia mori en ospital pos un ataca en Absard, en la rejion Damavand.

Hossein Dehghan, conselor militar de Aiatola Ali Khamenei ia promete “colpa” la esecutores como tona.

Departes de securia ueste crede ce Fakhrizadeh ia maneja un projeta secreta de armas nucleal, ma Iran insiste ce sua program nucleal ave intendes pasosa.

Mohammad Javad Zarif, ministro de esternas, ia urje la comunia internasional a “condena esta ata de teror de stato”.

La ambasador irani de la Nasiones Unida, Majid Takht Ravanchi, ia dise ce la mata es un viole clar de la lege internasional, desiniada per crea caos en la rejion.

Zarif ia culpa Israel per la ataca, disente ce lo mostra “indicas grave de rol israeli”. La nom de Fakhrizadeh ia es sitada en un presenta par Benjamin Netanyahu, ministro xef de Israel, sur la program nucleal de Iran en april 2018.

Israel ia fa no comenta sur la novas de la asasina.

Fakhrizadeh ia es la siensiste nucleal irani la plu famosa e un ofisior major de la Corpo de Gardores de la Revolui Muslim. En 2015, la jornal New York Times ia compara el a Robert Oppenheimer, la fisiciste ci ia dirije la Projeta Manhattan cual ia produi la armas atomal prima en la Gera Mundal Du.

On dise ce Fakhrizadeh, un profesor de fisica, ia gida Projeta Amad, un program secreta alegada cual ia es instituida en 1989 per rexerca la posiblia de construi un bomba nucleal. La projeta ia es cluida en 2003, longo la Ajenteria Internasional de Enerjia Atomal, ma Netanyahu ia dise ce documentos trovada en 2018 mostra ce Fakhrizadeh ia gida un program cual ia continua secreta la labora de Projeta Amad.

Suspetas ce Iran usa la program como un scermo per developa un bomba nucleal ia provoca la Uni European, la Statos Unida e la Nasiones Unida a pone punis economial sever contra la pais en 2010.