La reiales de Nederland es criticada sur sua vacanse

La familia reial de Nederland ia reveni a la pais pos un vacanse cual ia dura tra sola un dia, pos un reata negativa par la popla.

Re Willem-Alexander e Rea Maxima ia vola a la sol elinica a venerdi, ma ia reveni en la sera de ier. Los ia parti en cuando on ia introdui regulas nova de isoli a casa contra la coronavirus, e an si la reiales ia desobedi no regulas, los ia dise ce los ia es afetada par critica intensa.

Un declara par la re e rea ia dise: “Nos vole lasa no duta sur esta: per controla la virus COVID-19, lo es nesesada ce on segue la regulas. La debate sur nosa vacanse no contribui a acel.”

On ia ave parente alga confusa sur ci en la governa ia sabe sur la viaja e esce conselas ia es donada.

La monarcia nederlandes ave no rol formal en la maneja dial de la pais. Ma la ministreria de jenerales, dirijeda par Mark Rutte, la ministro xef, es encargada sur lo cual la monarcia dise e fa. Per esta razona, alga parlamentores urje ce Rutte esplica perce el no ia consela la reiales a cansela sua vacanse.

“Si Rutte ia ta dise ce esta es un mal idea, on pote suposa ce la re ia ta cambia sua intendes,” un parlamentor de la Partito de Labora ia comenta. La xef de GroenLinks, partito verde, ia descrive la viaja como “un era de judi” e ia dise ce abandona lo ia es “la sola deside coreta”.

La conta dial de infetas par coronavirus crese ancora en Nederland. Ier, on ia rejistra plu ca 8000 casos nova a la ves prima pos la apare de la maladia en la pais. On ia comanda ce bares, restorantes e caferias de canaba clui per cuatro semanas.

Esta no es la ves prima cuando la duple reial ia es criticada par sua condui. En agosto, fotos ia es publicida en cual los ia iniora regulas de distantia sosial con un posesor de restorante en un otra viaja a Elas.

On esamina aora la bujeta anial de la familia reial entre un presa cresente par legores oposante.