La regulas de debates presidental esuan va cambia

La comision cual supravide debates presidental en la SUA dise ce lo va cambia la formato per serti ce la du encontras restante entre Donald Trump e Joe Biden es plu ordinada.

La anunsia ia segue un debate disputosa a martedi cual ia dejenera a scaramuxas e insultas. La tono e tatica de la debate ia es criticada tra la pais e la mundo.

Reatas a la debate ia es ance dominada par comentas cual Trump ia fa sur un grupo estrema destriste, neofaxiste e sola mas, nomida “Proud Boys” (Xicos Orgulosa), cual promove violentia political.

En la debate, la moderor ia demanda esce la presidente ta condena supremistes blanca e ta comanda ce los retira se de protestas. Cuando Trump ia demanda ci on vole ce el condena, Biden ia dise “Proud Boys” a du veses.

La presidente ia responde: “Proud Boys – retira vos e stand by (= ‘regarda sin ata’ o cisa ‘prepara vos’). Ma me va clari… algun debe fa alga cosa contra ativistes antifaxiste e la sinistra, car esta no es un problem destriste.” Ier el ia atenta esplica esta comenta ambigua, ma sua oposores insiste ce el ia refusa condena supremistes blanca.

La Comision sur Debates Presidental ia declara formal ce la debate a martedi “ia clari ce on debe ajunta plu strutur a la formato de la debates restante per serti un discute plu ordinada de la temas”.

Un metodo nova sujestada es ce on ta silenti la microfones si la aspirores ta atenta interompe lunlotra o la moderor. La ecipo de Trump ia critica ja la proposas.

En la debate prima, Trump ia interompe constante Biden, provocante un serie de replicas en cual ambos omes ia parla a la mesma tempo. Trump ia insulta direta la intelijentia de Biden, e Biden ia nomi Trump un bufon, brusca comandante el a silenti.

On reporta ce la ecipos de ambos lados va es informada sur la regulas nova, cual no va es negosiable.