La persones mor par coronavirus esede 200 000

Plu ca 200 mil persones en la mundo ia mori aora par la maladia de la coronavirus nova, e on ave plu ca 2,8 milion casos confirmada.

Jornalistes governal en Xina ia reporta la mori prima conoseda en relata con la virus a 11 janero, e pos alora plu ca 210 paises e teritorios ia confirma casos.

Sinco paises – la Statos Unida de America, Italia, Espania, Frans e la Rena Unida – ia reporta aora plu ca 20 mil persones mor, ma la modos de conta varia multe.

En la SUA, un pais con popla grande, la cuantia ia pasa 50 mil. En la Rena Unida, la datos dial no inclui los ci mori a casa o en un cureria, donce la statistica vera va es serta plu alta. En Frans, moris en curerias es incluida, e sua cuantia de moris ia crese par 369 ier.

Beljia ave 6917 moris en un popla de 11,4 milion persones. Ma plu ca un dui de estas ia aveni en curerias per persones vea, e car la statistica refleta la casos suspetada, no la confirmadas, lo pare plu mal.

En la stato York Nova de la SUA, on ia rejistra plu ca 16 mil moris, e la governor ia permete ce farmasias nondependente fa probas per COVID-19. El va estende ance la probas per anticorpos a cuatro ospitales, comensante con laborores esensal.

Un orfaneria en Bielarus ia apela per aida governal, car des-tre de sua enfantes descapasida e des empleadas es infetada.

La Organiza Mundal de Sania dise ce lo es posible ce pasientes ci ia recovre de la virus no va es protejeda contra reinfeta. Plu temprana en esta semana, sua xef ia averti sur la cuantia cresente de casos de la maladia en Africa, Europa este, America Sentral e America Sude.

Singapor ia es inisial lodada per sua susede de conteni la virus, ma pos alora lo ia esperia un onda nova de infetas liada a locas industrial con dormerias densa abitada par laborores.

En otra partes de Asia, la autoriosas xines ia reporta ier no moris nova a la dia des en serie, e Corea Sude ia esperia sua dia du sin moris.