La ministro xef de Japan resinia par causa de maladia

Shinzō Abe, la ministro xef de Japan, va anunsia ce el resinia per razonas de sania. El ia sufri tra multe anios de colite ulserante, un inflama de la fore de la colon, ma on crede ce sua state ia mali plu resente.

La compania difusante NHK ia reporta ce esta om de 65 anios vole evita causa problemes per sua governa. En la anio pasada, el ia deveni la ministro xef japanes con la periodo la plu longa. El ia comensa en la posto en 2012.

Lo pare ce el no va resinia oji, ma va continua servi asta cuando un seguor es elejeda par sua Partito Democrata Liberaliste.

En 2007, el ia resinia de un periodo plu temprana como ministro xef par causa de sua batalia contra colite ulserante, un disturba cronica cual afeta la intestin spesa e con cual el vive ja de sua adolese.

Abe ave un reputa como un conservaliste e nasionaliste dedicada, e per stimula la crese par sua politica economica agresiva, nomida “abenomica”.

El ia forti la defendes de Japan e ia aumenta la spende militar, ma no ia pote revisa Article 9 de la constitui japanes, cual proibi un armada permanente per cualce intende otra ca autodefende.

Du visitas a ospital en un semana ia provoca demandas sur esce la sania de Abe deveni mal. El no ia revela la causa de la visitas, ma on reporta ce un ia ocupa cuasi oto oras.

El ia intende servi asta setembre 2021, e en martedi un de sua aidores ia dise ce el pensa ce Abe va completi sua periodo, rejetante un sujesta ce Abe va desasembla pronto la salon basa de parlamento per un vota jeneral.

An tal, rumores ia persiste sur la fatiga cresente de la ministro xef en cuando el responde a sempre plu critica de sua maneja de la pandemica, e a un tempo cuando la taso de aproba per sua consilio ia cade.