La governa lubnani resinia entre coleria cresente

La governa de Lubnan ia resinia, fasante sempre plu coleria en relata con la esplode cual ia ruina partes de Beirut e ia mata plu ca 200 persones a un semana ante aora. La anunsia ia es fada par Hassan Diab, ministro xef, en un parla nasional televisada en la sera de ier.

Multe persones ia acusa ce la xefes de la pais es culpable, alegante cualias de nonatende e dejenera moral. Protestores ia vade sur la stradas e ia scaramuxa contra la polisia en la dia tre en serie.

La esplode enorme ia es causada par la detona de 2750 tones de nitrato de amonio conservada tra anios a la porto en modo nonsecur.

Presidente Michel Aoun ia demanda ce la governa continua labora asta on pote formi un consilio nova.

Diab, ci ia deveni ministro xef en janero pos menses de nonprogresa, ia dise ce sua governa ia “fa pasos grande per presenta un mapa de via per salva la pais”.

En sua parla, el ia presenta se como un xef reforminte ma impedida par un sistem sobornosa cual esiste ja tra anios. El ia comenta ce esta problem es “plu grande ca la stato” mesma, e ce “un mur multe spesa e spinosa separa nos de cambia, un mur fortida par un clase ci adota tota metodos susia per resiste e reteni sua ganias”.

Parlamento va debe aora deside un ministro xef nova, en un prosede cual envolve la mesma politica setal cual es a la radis de la noncontentia de la protestores. La potia en Lubnan es compartida entre xefes ci representa la grupos relijial diversa de la pais.

Plu, pos la fini de la gera interna de 1975-1990, alga comandores militar ia entra a politica e los controla ancora partes grande de la campos political, economial e sosial de Lubnan. Multe protestores culpa esta sistem per la dejenera de la pais.