La governa iamani es atacada a un airoporto

A la min 22 persones ia es matada e plu ca 50 ferida en un ataca a la airoporto en la site Aden en la sude de Iaman.

On ia ave un esplode, cisa du, corta pos la ariva de Arabia Saudi de un avion portante la governa nova formida de la pais. Aidores carital e ofisiores ia es entre la vitimes, ma la ministro xef ia dise ce el e sua consilio es en bon state.

Iaman es ruinada par un gera cual ia intensi en 2015, cuando un alia de statos arabi, gidada par Arabia Saudi, ia inisia un opera militar per vinse la rebelores huti e restora la rena de Presidente Abdrabbuh Mansur Hadi.

La combate ia lasa plu ca 110 mil persones mor, ia crea la desastre umana la plu sever de mundo con miliones de persones faminte, e ia lasa la pais an plu afetable par la pandemica de covid.

Videos de la aveni ier mostra un esplode grande cuando pasajores ia comensa sorti de la avion cual ia transporta la consilio nova a Aden.

Un fola asemblada prosima a la avion per bonveni la ministros ia fuji en cuando fuma densa ia emerji de la construida de airoporto. On ia oia sonas de spara pos poca tempo.

La causa de la esplode no es clar. Un fonte ia informa jornalistes ce tre cartuxes de mortero ia atera sur la construida. Ma la canal saudi Al-Hadath ia difusa un video sur cual lo ia dise ce lo mostra un misil cual colpa la asfalto e esplode.

Sin culpa direta la hutis, la ministro xef Maeen Abdulmalik Saeed ia tuita: “La ata coarde teroriste cual ia ojeti la airoporto de Aden es un parte de la gera cual on fa contra la stato iamani e sua bon popla. Lo fa no plu ca aumenta nosa determina per reali nosa obligas.”

Plu tarda ier, un plu esplode ia aveni prosima a la palasio Maashiq, do la consilio ia refuja se. On ia reporta la tira a tera de un avioneta esplodente.

La consilio nova ia es formida per atenta remedia un divide durante entre la fortes de la governa, aidada par Arabia Saudi, e la militias fidosa a la Consilio Entretempo Sude, un grupo separadiste suportada par la Amirias Arabi Unida.

La du lados debe es aliadas en la gera interna contra la promove huti, cual controla la capital Sana e multe de la norde-ueste de Iaman. Ma en la du anios pasada, un luta per potia ia provoca multe rondas de disputa ferose entre la membros.