La familia de Franco debe redona sua cason de estate

Un corte en la norde-ueste de Espania ia declara ce un palasio de estate, usada par la tirano Francisco Franco, parteni a la governa e ce sua familia debe transfere lo.

La judor ia deside ce la Pazo de Meirás ia es donada a Franco en 1938 per sua rol como xef de stato, e no per razonas personal.

Franco ia rena Espania de 1939 asta sua mori en 1975. Sua desendentes ia atenta defende sua lega en la cortes a multe veses. En la anio pasada, los ia perde un batalia legal con la governa sosialiste de la pais per la direto de conserva sua restantes en un mausoleo a un monumento nasional nomida la Vale de la Cadedas.

Construida entre 1893 e 1907, la cason en A Coruña, un site galego, ia es orijinal poseseda par la familia de Emilia Pardo Bazán, un autor espaniol.

En 2018, on ia ave furia publica ce la netes de la tirano ia presenta la palasio per vende, a la custa reportada de oto milion euros. La situa ia intensi en 2019, cuando la governa espaniol ia rejistra un reclama legal sur la posese de la imobila, razonante ce un vende ofisial en 1941, cual ia transfere lo a la Franco e sua sposa, ia es frodante.

An si la governa ia es suportada par autoriosas local e rejional, la ses netes de Franco ia dise ce la vende en 1941 ia es valida. La neto Francis Franco ia acusa ce la governa ia atenta “venja” contra la familia Franco per refusa sede en la disputa sur la restantes de la tirano. La familia ia produi documentos demostrante ce los ia paia per renovi la imobila.

Judor Marta Canales ia acorda con un reporta scriveda en 2018 par espertas istorial e legal per la autoriosas legal, cual ia dise ce la vende de la palasio a Franco en 1941 no ia es un contrata autentica. El ia judi ce la dona inisial de la cason en 1938 ia es a “La Generalissimo de la armadas e xef de stato” ma no a la nom de Francisco Franco Bahamonde.

Franco ia nase en Galisia e, an a 45 anios pos sua mori, on senti ancora sua influe en Espania.