La coronavirus sperde de Italia en Europa

Alga paises european ia anunsia sua casos prima de la coronavirus COVID-19, e tota pare liada a la eruta cresente en Italia. Osteraic, Corvatsca e Suiz, como ance Jazair en Africa, ave casos en persones ci ia visita resente Italia.

On ia rejistra ance la proba positiva prima per la virus en America latina, en un person brasilera ci ia reveni de Italia.

En dias resente, Italia ia deveni la pais la plu afetada en Europa, con plu ca 300 casos e 11 moris. Ma sua visinas ia deside ce clui sua fronteras ta es un reata “nonproportial”.

Ier, a un consenta de ministros de sania de Frans, Deutxland, Italia e la Comision de la Uni European, on ia promete manteni fronteras abrida. “Nos parla de un virus cual no respeta fronteras,” la ministro italian de sania ia dise.

Italia es un de tre “puntos calda” estra Xina. En Iran, ofisial, min ca 100 persones ia es infetada, ma on suposa ce la cuantia vera es multe plu alta. La infeta de la visministro irani de sania ia aumenta la teme ce la virus ia sperde ja vasta.

Plu ca 1100 persones ia es infetada en Corea Sude, do 11 persones ia mori. La pais ave la plu infetas estra Xina. La militar de la SUA ia confirma ce un de sua soldatos stasionida en Corea Sude ia es positiva probada per la virus. La soldato, ci ave 23 anios, isoli aora se.

Multe de la casos en Corea Sude es liada a un ramo de la Eglesa Shincheonji de Jesus en la site Daegu. Tota de la plu ca 215 000 membros de la eglesa es aora esaminada par autoriosas de sania.

En Brasil, on ia reporta ier ce un proba inisial a un om de 61 anios ci ia visita resente Italia norde ia dona un resulta positiva. La om de São Paulo va es denova esaminada per confirma final. El ia reariva en Brasil a la culmina de la carnavales, cuando miliones de persones viaja tra la pais.

La plu de la casos de COVID-19 es ancora en Xina, do la coronavirus ia orijina en la anio pasada. Longo la statistica la plu resente, publicida oji, 78 064 persones ia es infetada de pos la comensa de la eruta.

Ofisiores de sania ia reporta ance 52 plu moris ier, la soma dial la plu basa de plu ca tre semanas. La cuantia intera de mores en Xina continental es aora 2715. La cuantia de infetas nova declina ala, e on turna sua atende a casos en otra paises e a la pasa de la virus entre los.