Japan developa satelites de lenio

La Universia de Kyoto ia combina sua fortes con un compania japanes per developa ante 2023 la satelites prima de lenio.

Sumitomo Forestry dise ce lo comensa rexerca la crese de arbores e la usa de materias de lenio en spasio. La asosia va esperimenta sur tipos diversa de lenio en ambientes estrema sur la Tera.

Detrito spasial deveni un problem plu grande par cada satelite lansada a la atmosfera. Satelites de lenio ta arde sin relasa sustantias nosiva a la aira, e donce sin cade pesos cuando los reveni a la Tera.

Takao Doi, profesor a la universia e astronauta japanes, ia esplica: “Nos es multe consernada par lo ce tota la satelites cual reentra a la atmosfera de la Tera arde e crea particulas pico de osido de aluminio cual va flota en la atmosfera alta tra multe anios. Ultima lo va afeta la ambiente de la Tera.”

Como astronauta, el ia visita la Stasion Spasial Internasional en marto 2008. Alora el ia deveni la person prima ci ia lansa un bumerang en spasio, spesial desiniada per usa en microgravita.

“La paso seguente va es developa la model de injenia de la satelite, e pos acel nos va fabrica la model de vola,” Doi ia ajunta.

Sumitomo Forestry, un parte de la Grupo Sumitomo fundida a plu ca 400 anios ante aora, ia dise ce lo va labora per developa materias lenial capas de resiste forte cambias de temperatur e la lus de sol. La lenio usada es un secreta.

Espertas ia averti ja sur la menasa cresente ce detrito spasial va cade a la Tera, con ce on lansa plu veculos spasial e satelites. Estas es sempre plu usada per comunica, televide, naviga e predise de clima. Rexercores investiga posibles per redui o sutrae la detrito.

On ave sirca 6000 satelites orbitante nosa planeta, longo la Foro Economial Mundal. Sirca 60% es detrito desusada. On estima ce 990 satelites va es lansada en cada anio de esta desenio, tal ce en 2028 on pote ave 15 mil en orbita.

La compania SpaceX de Elon Musk ia lansa ja plu ca 900 satelites Starlink e projeta envia miles de plu.

Car detrito spasial viaja a 35 mil cilometres per ora, lo pote fa danas major a cualce cosa cual lo colpa. En 2006, un peso pico ia colide con la Stasion Spasial Internasional, estraente un ageta de la fenetra refortida.