Fronteras plu laxe va reuni familias en Suiz

La paises visina Suiz, Deutxland e Osteraic comensa lejeri sua restrinjes de frontera a esta fini de semana, ante un reabri plen cual va inclui Frans en la media de junio.

La lejeri sinifia ce amis, familias e amores separada par la cluis de frontera va pote reuni.

La cuatro paises, de cual tota parteni a la zona Schengen de fronteras abrida, ia clui sua fronteras en marto per atenta controla la sperde de coronavirus. On ia preveni viajas par strada, ferovia e avion.

Deses de miles de persones ia es refusada a la fronteras. En Suiz, entra ia es permeteda sola a sitadanes suiz, persones con lisensas de labora, e laborores esensal de sania.

A tre menses pasada, tal restrinjes ia es nonimajinable. La 26 paises Schengen ia es abituada a viajas lisa. La usa de un tren de Berlin a Basel, de Geneve a Paris, o de Wien a Zürich ia es un aveni dial cual cadun ia suvalua.

La restrinjes ia afeta spesial forte la comunias a la fronteras. En la “Triangulo Basel” do Deutxland, Frans e Suiz toca, la comersias local es interdependente. Miles de persones traversa la fronteras a cada dia per labora, per encontra amis o familianes, o per visita botecas.

Alga persones, de ci sua locas de labora ia es ancora abrida, ia pote ancora viaja, ma la plu de abitores en la comunias de frontera, abituada a pasa sua dias en du o an tre paises, ia trova ce los es cluida en un sola, e comun separada de sua familia prosima o sua amores.

A la comensa de maio, cuando la cuantia de casos de la virus ia cade, la governas de la zona Schengen ia comensa discute un reabri. No pais ia vole es la prima, ma ance no pais ia vole manteni la clui de sua frontera si sua visina ta abri la sua.

Per la vilas fronteral Konstanz en Deutxland e Kreuzlingen en Suiz, la lejeri a esta fini de semana es multe importante. Tra la anios, esta sites ia deveni un sola. Stradas corta pote es en Suiz a un fini e en Deutxland a la otra.

Cuando on ia erije un serca e paradores per enforsa la cluis de frontera, esta ia angusa multe persones e ia creve de cores de alga. Visinerias ia es divideda. Duples abitante a la du lados de la frontera ia trova se en separa. Jeneras diversa de la mesma familia no ia pote plu visita lunlotra.

En loca, los ia asembla a la serca per parla e intercambia novas tra la rede de filo. La serca – cual on ia dupli plu tarda per preveni ce persones besa tra lo – ia deveni rapida decorada con flores, notas e imajes de cores creveda.

En otra rejiones, duples e amis ia viaja a la partes la plu distante de la frontera, divideda sola par un sinta, per vide lunlotra.

Aora, pos un promove intensa en Berlin e Bern par maiores en esta rejiones, la fronteras va reabri per amores separada e familias divideda. E los ci lua jardinetas a la otra lado de la frontera va pote final cura los denova.

Ma per turistes, comprores e persones mera curiosa, la fronteras resta cluida.