Europa fasa ses menses difisil de pandemica

La Organiza de Sania Mundal (OSM) ia averti ce la ses menses veninte va es “difisil” per Europa, cual sufri denova su la pandemica de coronavirus. La continente ia rejistra plu ca 29 mil moris nova par COVID-19 en la semana pasada.

An tal, Hans Kluge, dirijor OSM per Europa, ia dise ce la cuantia de casos nova redui car regulas de isoli preveni infetas.

A un confere virtual ier, Ursula von der Leyen, presidente de la Comision European, ia dise ce lo es posible ce on va aproba du vasines ante la fini de esta anio.

La plu paises european ia reintrodui restrinjes sever per impedi la sperde de la maladia cuando un onda du de la pandemica ia aselera en otobre.

Asta aora, longo datos de la OSM, Europa ia esperia 15 738 179 infetas confirmada e 354 154 moris atribuida a la coronavirus. Sola la Americas ia reporta un statistica rejional plu alta.

Multe de esta infetas e moris ia es rejistrada en Deutxland, Espania, Frans, Italia, Rusia e la Rena Unida. En Europa, la Rena Unida ave la cuantia la plu alta de moris (53 870), e Frans ave la plu casos (2 115 717).

Kluge ia dise ce Europa representa 28% de casos global e 26% de la moris. El ia espresa ansia spesial sur la situa en Suiz e Frans, do departes de cura intensa es aora ocupada a plenia de 95%.

“Europa es aora denova la episentro de la pandemica, en junta con la Statos Unida,” Kluge ia dise, ajuntante ce la statistica la plu resente mostra ce “un person mori a cada secondo 17”.

“On ave lus a la fini de la tunel, ma esta ses menses va es difisil,” el ia dise, referente a la developa de vasines cual instrui la sistem imunial a combate la virus. Estas ia leva esperas ce on va pote controla la pandemica.

Xefes de la Uni European ia produi un bujeta de 1,8 milion milion euros per la periodo asta 2028, incluinte un reserva de 750 mil milion euros per recovre de la virus. Ma Ungaria e Polsca ia refusa aproba la bujeta, car la finansia es liada a la obedi de lege en la bloco.