Contas major de Twitter es saisida par frodores

Twitter ia sufri un fali major de securia ier, cuando piratas ia saisi controla de la contas de figures publica e corporas major, incluinte Joe Biden, Barack Obama, Elon Musk, Bill Gates, Jeff Bezos e Apple.

La compania ia confirma la ataca en la sera de ier, a plu ca ses oras pos cuando lo ia comensa. Lo ia atribui la problem a un “ataca coordinada de injenia sosial” contra sua propre empleadas cual ia permete ce la piratas asede “sistemes e utiles interna”.

Twitter ia dise ce lo “investiga esce los ia fa otra condui malvolente o ia asede otra informa” en ajunta a usa la contas atacada per envia tuitas.

La ataca ia aveni en curso de alga oras. Per combate lo, Twitter ia preveni tuitas par tota contas ofisial sertida – un metodo sin presedente. La compania ia restora la plu contas ante la sera de ier, ma ia averti ce lo “va fa cisa plu atas” en responde.

Twitter ia dise ce lo ia clavi la contas saisida e ia “usa metodos per limita la asede a sistemes e utiles interna” en cuando lo continua sua investiga.

La contas piratida, cual ave deses de miliones de seguores, ia envia un serie de tuitas per ofre un froda clasica de bitcoin. La seguores ia es informada ce si los ta transfere criptomone a un portamone dijital spesifada, los ta reseta la cuantia duple par intercambia.

La mesajes ia inclui la adirije de un portamone de bitcoin, de cual sua salda ia crese rapida asta plu ca 11 BTC (plu ca $100 mil) en cuando la froda ia sperde. Tuitas con mesajes simil ia es sutraeda e reenviada a multe veses par alga de la contas afetada, tra la posmedia de mercurdi.

An si on ancora no conose la motivas e fonte de la ataca, la devia coordinada de la flues de comunica sertida de xefes de mundo, persones famosa e contas major de corpora ia es un aveni asustante.

Twitter ia deveni, par fato, un servi de comunica per la mundo, e es usada par governas per comunicas ofisial a tempos de crise. Un otra ataca con estende simil ta es cisa plu turbante o an perilosa.