Assad desemplea sua ministro xef entre protestas economial

Presidente Bashar al-Assad de Suria ia desemplea sua ministro xef Imad Khamis, en batalia un crise economial profondinte cual ia provoca protestas.

Jornales governal ia dona no razona per la deside de recambia Khamis, ci ia deveni la ministro xef en 2016. Ma lo ia segue dias de protestas rara contra la governa en Suweida, un site durzi, do la popla ia urje la suverti de Assad.

La valua de mone en Suria ia basi resente, altinte la custas. La governa, de ci sua suportores ia reali un contraprotesta en Suweida, ia culpa punis finansial par la ueste e manipulas de la taso de intercambia.

En la semana veninte, un scema nova par la SUA va ojeti individuas ci ia suporta Assad e sua aliadas en la gera interna suri de nove anios cual ia mata plu ca 380 mil persones.

Suweida ia evita jeneral la terores de la gera. La plu de la durzis, membros de un seta secretosa separada de islam, ia resta fidosa a Assad, temente ce minorias relijial ta es atacada si el ta es suvertida, e la site ia resta en la manos de la governa.

Diseda par la Program Mundal de Nuri, un departe de la Nasiones Unida, on ave 7,9 milion persones en Suria ci no pote come sufisinte, e 1,9 milion plu en peril de acel situa.

Analistes dise ce la crise economial en Lubnan ia fa efetos en Suria en menses resente. Un deside par bancos lubnani de restrinje la relasa de mone de contas de banco ia redui multe la furni de dolares esuan en Suria.

La valua de la lira suri ia colasa en la mercato negra, ateninte un basa recordo de 3000 liras per un dolar esuan en esta semana, plu ca la cuatruple de la taso ofisial de 700. Ante la gera, la lira suri ia es intercambiada a 47 per dolar.

On teme ance sur punis finansial nova sever par la SUA cual va es realida a mercurdi veninte. Estas va es puntada a cualce person stranjer ci ia dona intendente suporta finansial, material o tecnolojial a la governa de Suria, o ci opera militar en Suria per la governas de Suria, Rusia o Iran.