Apple, Amazon, Facebook, Google e la legores

La xefes de alga de la companias tecnolojial la plu grande de mundo ia apare ante legores esuan en Washington, per defende sua companias contra alegas ce los malusa sua potia per supresa sua competores.

Jeff Bezos, xef de Amazon, ia dise ce la mundo “nesesa companias grande”, e la xefes de Facebook, Apple e Google ia razona ce sua companias ia coraji inovas.

Legores considera regulas plu sever, e on investiga la situa de compete. Alga criticores vole ce on desasembla la companias a pesos min grande.

La legores democrata ia demanda a la tecnolojistes sur temas de compete, ma la republicistes ia es plu interesada a la maneja de informa e a esce la companias marjinali opinas conservaliste.

David Cicilline, la democrata ci gida la comite parlamental de esta escuta, ia dise ce un investiga par legores tra un anio ia mostra ce la plataformas enlinia “ia usa sua potia en modos destruinte e nosiva, per crese”. El ia es convinseda ce la companias es monopolios.

Mark Zuckerberg de Facebook, Jeff Bezos de Amazon, Sundar Pichai de Google, e Tim Cook de Apple ia insiste ce los ia fa no cosa nonlegal, e los ia asentua la radises e valuas esuan de sua companias.

A la escuta, legores ia acusa ce Google ia fura contenidas creada par companias plu peti, como Yelp, per reteni usores en sua propre pajes de rede.

On ia foca ance a la trata par Amazon de vendores en sua pajeria, la compra par Facebook de companias competente como Instagram, e alga praticas en la boteca de apes de Apple.

Cicilline ia dise ce Amazon ave un desacorda interna de interesas, car lo ospita vendores ma ance compete contra los par ofre produidas simil. Esta pratica ia es investigada ance par regulores en Europa.

An tal, alga republicistes ia indica ce los no vole divide la companias o revisa profonda la leges de compete en la SUA. Un comitor ia comenta ce “cosas grande no es inerente mal”.

Aparente a distantia par video, la dirijores ia defende sua companias, disente ce sua produidas aida companias plu peti e ce los pote ancora es danada par compete par companias nova.

Tim Cook de Apple ia dise ce la clima comersial es “tan competosa ce me ta descrive lo como un batalia sur strada per proportio de mercato en la comersia de telefonetas”.

Bezos, en sua apare prima ante la Congresa, ia nega ce la roles multiple de Amazon representa un desacorda de interesas, ma el ia confesa ce la compania esamina sua modo de prosede datos sur vendes par otra vendores en la pajeria.

On ia acusa Amazon de usa tal informas per inisia sua propre varia de produidas bonvendeda.

Bezos ia dise ce la regulas de Amazon proibi ce empleadas regarda datos sur vendes par companias individua, ma el ia aseta ce lo es posible ce alga persones ia iniora la proibi. “Nos investiga acel,” el ia dise.