AORA OJI
Novas de la mundo, simple reportada en elefen
2021 · 2020 · 2019 · 2018 · 2017 · 2016 · 2015 · 2014 · 2013

Alarma a un onda de caldia recordo en Sibir

18 junio 2020

Un onda longa de caldia en Sibir es “nondutada alarmante”, siensistes de clima dise. On asosia la temperatur nonusual con focones savaje, un malversa jigante de petrolio, e un pesta de papilios cual come arbores.

A la scala global, la caldia sibirsce aida dirije la mundo en 2020 a sua anio la plu calda rejistrada, an con la redui tempora de emetes de carbono par causa de la pandemica de coronavirus.

La temperatur en la rejiones polal crese la plu rapida, car la corentes maral porta caldia en dirije a la polos, do lo fonde la jelo e neva refletante.

Vilas rusce en la Sirculo Artica ia esperia resente temperatures estracomun, con ce Nijniaia Pexa ia ateni 30°C a 9 junio e Catanga, cual ave normal un temperatur de sirca 0°C en esta saison, ia rejistra 25°C a 22 maio. Sua recordo presedente ia es 12°C.

En maio, la temperatur surfasal en partes de Sibir ia ateni asta 10°C plu ca la promedia, diseda par la Servi Copernicus de Cambia Climal (C3S) de la Uni European. Martin Stendel, de la Instituida Meteorolojial Dansce, ia dise ce la temperatures nonormal esperiada en la norde-ueste de Sibir en maio ta aveni probable a sola un ves en 100 000 anios sin la caldia global causada par umanas.

Freja Vamborg, un siensiste major a C3S, ia comenta: “Lo es nondutada un sinia alarmante, ma no sola maio ia es nonusual calda en Sibir. Tota de inverno e primavera ia ave periodos repeteda con temperatur de aira surfasal plu alta ca promedia.

“An si la planeta intera caldi, esta no aveni egal en tota locas. Sibir ueste es notable como un rejion cual mostra un tende plu avertinte, con varias plu alta de temperatur. Donce, a alga grado, anomales grande de temperatur no es nonespetada. An tal, lo cual es nonusual es la cuantia de tempo tra cual la anomales plu calda ca promedia ia persiste.”

Robert Rohde, la siensiste xef a la projeta Berkeley Earth, ia dise ce Rusia jeneral ia esperia temperatures recordo alta en 2020, con ce la promedia de janero asta maio ia es plu alta ca la promedia de 1951–80 par 5,3°C. Esta es “un recordo nova par un aumenta enorme de 1,9°C”, el ia dise.

En desembre, la presidente de Rusia, Vladimir Putin, ia comenta sur la caldia nonusual: “Alga de nosa sites ia es construida a norde de la Sirculo Artica, sur la permajelada. Si lo comensa dejela, on pote imajina la efetos cual lo ta fa. Lo es multe grave.”

La dejela de permajelada ia es a la min partal culpable per un malversa de gasolio en Sibir en esta mense, pos cual Putin ia declara un state de crise. La suportas de la tance ia afonda subita, diseda par sua operores; organizas verde ia sujesta ce ance la eda e manteni povre de la infrastrutur es culpable.

Focones savaje ia arde tra sentos de miles de ectares de la forestas sibirsce. Cultivores ensende comun focos en la primavera per sutrae plantas, e un combina de temperatures alta e ventas forte ia causa ce alga focos ia deveni noncontrolable.

Xamas de bombises sibirsce, de ci sua larvas rode arbores conifer, ia crese rapida en la temperatur levante. “En tota mea carera longa, me ia vide nunca papilios tan enorme e tan rapida cresente,” Vladimir Soldatov, un esperta sur papilios, ia dise. El ia averti sur “efetos trajedial” per forestas: la larvas va sutrae la agos de la arbores e va fa ce los deveni plu afetable par focones.

Esta paje es presentada con la lisensa CC Attribution-Share Alike 4.0 International.
Lo ia es automatada jenerada de la paje corespondente en la Vici de Elefen a 10 novembre 2021 (17:34 UTC).