Xefes de stato discute la crise de clima en Espania

Xefes political e diplomatas climal consenta en Madrid per du semanas de discutes, ensircada par un senti cresente de crise. Diseda par António Guterres, secretor jeneral de la Nasiones Unida, “la punto de cual on no pote reveni es no plu ultra la orizon”.

On ia intende ce esta congresa de la partitos, nomida COP25, va aveni en Txile, ma la governa ia cansela lo pos semanas de turbas sivil. Espania ia ofre alora ospita la aveni, cual va reseta 29 000 partisipores en sua du semanas.

Parlante a ante, Guterres ia dise ce la crise climal es menasante e ce xefes political debe responde:

“En la des-du menses importante cual veni, lo es esensal ce nos securi prometes nasional plu aspirante – spesial de la emetores major – per comensa, sin retarda, redui emetes de gases invernerial con un rapidia cual coere con ateni neutralia de carbono ante 2050. Simple, nos nesesa sesa escava e fora, e esplota la posibles vasta ofreda par enerjia renovable e solves con fundas natural.”

Cuasi cada pais de mundo ia suscrive e validi aora la acorda climal de Paris. Su la acorda, tota de los va debe fa un promete nova sur la clima ante la fini de 2020.

On previde ce 50 xefes de stato va es presente a la consenta en la capital espaniol, ma la presidente de la SUA no va es entre los. En loca, Nancy Pelosi, ci preside la Salon Basa en acel pais, va vade a la confere con un delega de congresores.

Asentuante la efetos de la clima cambiante en la mundo real, un reporta de Salva la Enfantes, un asosia carital, dise ce “xocas climal” menasa deses de miliones de persones en la este e sude de Africa.

Lo dise ce inondas, liscateras, secia estrema e siclones ia trae 33 milion persones a un manca crisin de comables. On crede ce plu ca un dui de estas es enfantes.

La situa es malida car la du siclones la plu forte en la istoria rejistrada de Africa ia afeta la mesma rejion a interval de mera alga semanas. Siclon Idai ia bate Mosambic, Zimbabue e Malaui en marto pasada, e pos ses plu semanas, Siclon Kenneth ia causa inondas grave en Mosambic.

Guterres va informa la congresa ce la clima ia deveni aora un crise plen creseda. El va urje paises a grandi notable sua aspiras de redui carbono: on debe fini la suvenis per estrae combustables de fosil, e construi no sentros eletrical enerjida par carbon pos 2020.