Un urso gris mata un musiciste en Canada

Un om canadian franses ia mori pos es atacada par un urso gris en un rejion distante de Canada en la semana pasada.

Julien Gauthier, un musiciste de 44 anios, ia es surprendeda par la bestia cuando el ia dormi. El ia es viajante longo la Rio Mackenzie, rejistrante sonas de natur per un projeta musical.

Usual, atacas nonprovocada par ursos gris es multe rara.

A 15 agosto, a sirca 07:45 de ora local, la Polisia Montante Canadian Real ia es avisada par un transmetador de crise en la rejion Tulita en la Teritorios Norde-Ueste, un loca multe isolida cual on pote asede sola par mar o aira.

Camille Toscani, un biolojiste ci ia viaja con Gauthier e ia fa la alarma, ia dise ce Gauthier ia es tirada a via par un urso en la media de la note.

Par causa de mal clima, la polisia ia envia un elicotor a la rejion per xerca el e evacua la viajores. On ia trova sua corpo a la dia seguente.

La vitim ia es un composor e injenior de sona. El ia esplica sua projeta a un plataforma de finansia coletiva, disente ce el intende vade par canoa longo la Rio Mackenzie de Fort Providence asta Inuvik (sirca 1500 cilometres).

El ia nase e crese en Canada con sua madre e padre franses, ma ia move a Frans per abita a la eda de 19 anios.

La Orcestra Simfonial de Bres, per ci Gauthier ia es un composor permanente de 2017, ia onora el, disente ce el ia es “un om sentosa, jenerosa e talentosa” ci ia ave “un desira de aventur, mervelia e intelijentia rara”.

Toscani ia dise: “Lo ia es sua fantasia: vade ala, vade a la Norde. El ia demanda ce me partisipa en esta aventur. Nos ia pensa sur lo tra tre anios. Nos ia es tan felis ce nos ia pote fa lo. El ia es un artiste unica, inspirada par spasios abrida e natur.”

En la anio pasada, el ia pasa sinco menses en rejistra sonas en la Isolas Kerguelen en Antartica. La resulta de acel viaja ia es un peso nomida Simfonia Sude, cual ia es difusada en radio franses.