AORA OJI
Novas de la mundo, simple reportada en elefen
2021 · 2020 · 2019 · 2018 · 2017 · 2016 · 2015 · 2014 · 2013

Un scema nova per turisme en Arabia Saudi

27 setembre 2019

Arabia Saudi va abri sua portes a turistes internasional a la ves prima, como parte de un promove plu grande per redui sua depende economial de petrolio.

La rena va inisia oji un sistem de visas per 49 paises, e va deseveri sua regulas de veste per visitores fema. La ministro de turisme, Ahmad al-Khateeb, ia descrive esta como “un momento istorial” per la pais.

Asta aora, visas ia es jeneral restrinjeda a peregrinores, comersiores e laborores stranjer.

La pais espera ance gania investis stranjer en sua industria de turisme. Lo vole ce la turisme crese de 3% asta 10% de sua produi interna bruta en la desenio veninte.

“Visitores va es surprendeda par la tesoros cual nos ave per comparti – sinco locas de erita mundal de UNESCO, un cultur local pulsante, e belia natural encantante,” la ministro ia dise.

Visitores fema stranjer no va es obligada a porta la roba abaia cual covre la corpo e debe es publica portada par femes saudi, ma los va debe vesti se en modo ancora modesta. On va ave ance no restrinjes contra la visita de la pais par femes nonacompaniada.

“Nos ave un cultur,” al-Khateeb ia dise. “Nos crede ce nosa amis e nosa ospitadas va respeta la cultur, ma lo es serta modesta e lo va es multe clar.”

On ancora no va permete ce persones nonmuslim visita la sites santa Maca e Medina, e on va manteni la proibi contra alcol. Plu detalias sur la scema, incluinte la lista de cual paises cuali, va es furnida en la plu tarda de oji.

La ministro de turisme ia comenta ce el no crede ce la ataca resente contra la industria de petrolio de Arabia Saudi va fa ce persones deside no visita.

“Nosa sites es entre la sites la plu secur de la globo. Donce nos tota no crede ce lo va fa un efeto a nosa projetas. Nos ave ja tota la sitadanes stranjer ci abita en Arabia Saudi, joiante Arabia Saudi. Nos es multe secur,” el ia dise.

La scema per abri la turisme es un parte sentral de la program plu larga de reformi economial de Mohammed bin Salman, la prinse erital, per redui la foca de la rena a petrolio.

Longo la projeta, Arabia Saudi vole aumenta visitas internasional e interna asta 100 milion per anio, en o ante 2030. La governa previde la crea de milion empleas en turisme.

An tal, la cambia aveni a un tempo cuando la rena ave un imaje internasional manxada, entre criticas de sua istoria de diretos umana pos la omiside de jornaliste Jamal Khashoggi en la anio pasada, e un colpa resente contra ativistes per diretos fema.

En 2017, Arabia Saudi ia anunsia un projeta enorme per developa turisme, cual va cambia sincodes isolas e otra locas a la Mar Roja a vacanserias lusosa. En la anio pasada, on ia comensa construi un “site de diverti” prosima a la capital Riad, cual va inclui parces divertinte, complesos per sporte de autos, e un rejion de safari.

Esta paje es presentada con la lisensa CC Attribution-Share Alike 4.0 International.
Lo ia es automatada jenerada de la paje corespondente en la Vici de Elefen a 10 novembre 2021 (17:34 UTC).