Sete paises suscrive per proteje la Foresta Amazona

Sete paises de America Sude ia acorda medias per proteje la basin de la Rio Amazona, entre ansia global sur focones enorme en la foresta tropical la plu grande de mundo.

Bolivia, Brasil, Colombia, Ecuador, Guiana, Peru e Suriname ia suscrive un trata, instituinte un rede per responde a desastres e un sistem de monitori par satelite. A sua confere en Colombia, los ia acorda ance labora sur reforesti.

Plu ca 80 mil focones ia eruta en la Foresta Amazona en esta anio.

“Esta consenta va dura como un macina coordinante per la presidentes ci comparti esta tesoro – la Amazona,” Iván Duque ia dise, la presidente colombian ci ia ospita la confere en la site Leticia.

Entretempo, Martín Vizcarra ia dise: “La bonvole solitar no sufisi plu.”

La sete nasiones ia acorda ance per dona plu labora a la educa e per aumenta la rol de comunias nativa.

La paises ia es representada en Leticia par presidentes, vispresidentes e ministros. La presidente estrema destriste de Brasil, Jair Bolsonaro, ia partisipa par un lia video car el ia es en prepara per sirurjia.

La Amazona es un reteneria esensal de carbono cual lenti la caldi global, e 60% de lo es situada en Brasil.

La cuantia de focones entre janero e agosto 2019 es la duple de esta de la mesma periodo en la anio pasada, longo la Instituida Nasional per Rexerca Spasial de la pais.

Bolsonaro ia reseta criticas intensa en Brasil e internasional ce el fali proteje la rejion. Ambientistes dise ce sua politicas ia causa la crese de la cuantia de focones en esta anio, e ce el ia coraji ranxores de boves a sutrae bandas vasta de la foresta pluvosa pos sua eleje en otobre pasada.

Ance Bolivia ia esperia focones en la foresta, prosima a sua fronteras con Brasil e Paraguai.

Entretempo, companias cultival e la grupo xef de companias esportante carne de Brasil ia junta se a un campania ambiental, recomendante la fini de la desforesti de tera publica en la Amazona, e esijente ce la governa reata.

Alga vendores internasional ia dise ce los suspende compras de cuoro brasilera par causa de la lias entre la ranxos e la focones cual destrui partes de la foresta.