Protestas rara contra la presidente en Misre

En Misre, gas lacrimojen ia es xutada per sperde la popla a alga de la protestas prima pos la ariva a potia de presidente Abdul Fattah al-Sisi en 2014.

Sentos de misris ia pleni la Plaza Tahrir en Qahira, un loca major en la Revolui Misri de 2011, per esije ce la presidente resinia.

Protestas ia aveni ance en otra locas en la pais. Los ia es un reata sur alegas de froda contra la governa de Sisi. On ia aresta a la min sinco persones.

Un comersior e ator misri, Mohamed Ali, ia posta un serie de videos acusante ce la xef de la pais ia malspende miliones per casas e oteles lusosa, en cuando un proportio grande de la popla vive en povria. Misre ia segue un politica de economia sever en anios resente.

Sisi ia rejeta la alegas como “mentis e malacusas”.

La espresas “Sisi a via” e “La popla vole suverti la governa” ia es a la alta de la lista de tendes de Twitter en Misre en la tarda de ier.

Sentos de protestores antigovernal ia asembla en e sirca la plaza, an con atentas per sperde los.

Protestas ia es reportada ance en Alexandria, la site du de la plu grandes en la pais, en Suez, e en la vila Mahalla el-Kubra a norde de Qahira. On dise ce an a alga dias pasada, tal senas ia es nonimajinable.

Ali, ci abita en Espania, en esclui autoelejeda, ia posta sua video prima a 2 setembre. En un video a martedi, el ia dise ce si Sisi no resinia ante jovedi, “la popla misri va veni a la plazas a venerdi en protesta”.

En 2013, Sisi ia gida la suverti militar de la presidente prima democrata elejeda de Misre, Mohammed Morsi, pos protestas contra sua rena.

Pos alora, el ia supravide un represa de disenti cual grupos sur diretos umana descrive como sin presedente, e par cual deses de miles de persones ia es detenida.

En april, la popla de Misre la vota per aproba cambias constitual cual pote estende la periodo presidental de Sisi asta 2030. 44% de misris ia partisipa en acel vota.

Sisi ia gania 97% de votas en la eleje presidental en la anio pasada, cuando el ia ave no oposor major.